V

V-8ყოველი თვის მეხუთე დღეს. ხუთი ახალი მოდელი. იყიდება მხოლოდ ონლაინ. მხოლოდ ხუთი დღის განმავლობაში (ან კოლექციის ამოწურვამდე) – ეს არის ბიზნეს-მოდელი, რომელსაც იყენებს კომპანია Fifth Watch.

ადრე კომპანია Triangl.-ზე დავწერე. ის ბიკინის კერავს და ეს საათებს აწარმოებს, მაგრამ ბევრი კი აქვთ საერთო. ორივე ავსტრალიურია. ორივე შეყვარებული წყვილის დაფუძნებულია. ორივე მხოლოდ ინტერნეტ-მაღაზიის მეშვეობით ვაჭრობს. ორივეს პოპულარობის ზრდას სოციალურ ქსელები უწყობს ხელს – ინსთაგრამი და თვითერი, ფეისბუქი და თამბლერი, Pinterest და WeHeartIt… დიზაინიც კი მსგავსია. ისე, როგორც ბიკინის დიზაინი შეიძლება ჰგავდეს საათისას – სადა და მინიმალისტური.

Continue reading

ყველაზე ყალბი

ერთხელ, პატივცემულმა ლილუმ (ლექტორი იყო ჩემი) იმდენი Pepsi vs. Coke რეკლამა გვაყურებინა ზედიზედ, რომ დალევა კიარა დანახვა აღარ მინდოდა მაგათი. გამოვედი აუდიტორიიდან და “საირმე” ვიყიდე. 🙂

რეკლამა უთვალავი მინახავს, მაგრამ იმაზე ყალბი, კაცს საქართველოდან გერმანიაში რომ მიაქვს ლუდი, ცხოვრებაში არ მინახავს და, ალბათ, ვეღარც ვნახავ.

რამდენად რათა, ტურიკ, რათა???

ამას ისევ ისა სჯობდა, წიგნების თუ რაღაცა პროექტი როა, იქ გამოსულიყავი და გეთქვა პარმენ ლორია მირჩევნია სერვანტესსო. უფრო დაგიჯერებდა კაცი.

ოლანდი და ეკლერი

და ხრუშჩოვი & პეპსი-კოლა

Khrushchev, Nixon and vodka1952 წელს დუაით ეიზენჰაუერმა არჩევნებში გაიმარჯვა და აშშ-ს 34-ე პრეზიდენტი გახდა, რიჩარდ ნიქსონმა კი ვიცე-პრეზიდენტის სავარძელი დაიკავა. იმ ხანებში ხელისუფლება შეიცვალა კრემლშიც – შიდაპარტიული შეთქმულების შედეგად ჯერ ბერია დააპატიმრეს, შემდეგ პრემიერი მალენკოვი ჩამოალაბორანტეს და 1953 წელს საბჭოთა კავშირის სათავეში ნიკიტა ხრუშჩოვი მოექცა. 1956 წელს დიდი ცვლილებები განხორციელდა “პეპსიკო”-ში – დონალდ ქენდალი კომპანიის ახალი ვიცე-პრეზიდენტი გახდა მარკეტინგის დარგში.

საიდან სადაო, მაგრამ ეს სამი ამბავი მიჰყვა ერთიმეორეს იმგვარად, რომ ამერიკული კაპიტალიზმის ერთ-ერთმა სიმბოლომ და ფლაგმანმა, მტრული იდეოლოგიის ნაშობმა გაზიანმა გამაგრილებელმა სასმელმა “პეპსი-კოლამ” რკინის ფარდა გაარღვია და საბჭოთა კავშირში შემოაღწია.
Continue reading

Bitcoin

Bitcoin “მე ვარ ბანგულზი ბაბანგიდა, პრეზიდენტ ბაბანგინდას შვილიშვილი 5 მილიარდიანი მემკვიდრეობა მერგება, სასწრაფოდ მომწერე შენი ანგარიშის ნომერი სადაც ამ ფულს ჩამირიცხავენ და ნახევარ მილიონს დაგიტოვებ საკომისიოს სახით…”

მსგავსი ი-მეილი, უთუოდ, მიგიღიათ. ამბავი, ახლა რომ უნდა მოგიყვეთ, ამას ჰგავს, მაგრამ სრული სიმართლეა: ერთმა ღარიბმა სტუდენტმა 2009 წელს 25 დოლარის ღირებულების ვირტუალური მონეტები შეიძინა. სამი წლის შემდეგ ჩახედა მის ვირტუალურ საფულეს და იქ 5’000 მონეტა აღმოაჩინა, რომლის საერთო ფასი სრულიადაც არავირტუალური მილიონი აშშ დოლარი იყო. და მილიონზე მეტიც. ამ მონეტას ჰქვია ბითქოინი. 2009 წლის 3 იანვარს გამოჩნდა პირველად და თავისუფალ მიმოქცევაში მყოფი ვირტუალური ვალუტაა (უფრო ხშირად გამოიყენება დასახელება კრიპტო-ვალუტა, მაგრამ სიმარტივისთვის ვირტუალურს დავუძახებ) – აინსტალირებ სპეციალურ პროგრამას, ხსნი ბითქოინ-საფულეს და ვაჭრობას იწყებ. შეგიძლია ერთ დღეს შეიძინო ბითქოინები, მეორე დღეს – გაყიდო ან კიდევ იყიდო ან არაფერი ქნა და შეინახო. ეყაროს თავისთვის. ბითქოინის შენახვისთვის საკომისიოს არვინ გთხოვს, მაგრამ მისი კურსი იცვლება. როგორც ნებისმიერი სხვა ვალუტისა. არის ჟამი ბითქოინის ყიდვისა და არის ჟამი გაყიდვისა.

თუმცა, მისი ყიდვის ყველაზე კარგი ჟამი აწ უკვე ჩავლილია. 😦

Continue reading

ავიაკომპანია, რომელმაც ფრთები ჩამოყარა

starbook-airlines-air-hostessძვირფასო მგზავრებო, გთხოვთ სავარძლები მოიყვანოთ ვერტიკალურ  მდგომარეობაში და შეიკრათ უსაფრთხოების ღვედები. ეკიპაჟი მოგესალმებათ და გისურვებთ ტკბილ მგზავრობას.

უთუოდ ასე დაიწყებოდა თქვენი მოგზაურობა Starbrook Airlines-ის ავიახომალდით, მას რომ ფრენა შეეძლოს. მაგრამ არ შეუძლია. ეს ხომ ერთადერთი ავიაკომპანიაა მსოფლიოში, რომლის მთელი ავიაპარკი შოკოლადის თვითმფრინავებისგან შედგება… თუმცა, ყოველთვის ასე კი არ იყო – Starbrook Airlines პატიოსნად ცდილობდა ეფრინა და ავიაგადაზიდვები შეესრულებინა სანთა ბარბარაში. ამ მიზნით პირველი მსოფლიო ომით ალმოდებული ევროპიდან აშშ-ში გახიზნულმა ბელგიელმა ემიგრანტმა ჟან-ბაპტისტ ლეროიმ 1914 წელს შეიძინა აწუკვე ლეგენდად ქცეული თვითმფრინავი Curtiss JN-4, მეტსახელად Jenny. მისმა შვილებმა ემილმა და ჯექმა, რომლებიც პროფესიონალი მფრინავები იყვნენ და აშშ საფოსტო სამსახურში მუშაობდნენ, 30-იანებში გადაიბარეს მამის საქმე – Starbrook Airlines-ს სამოქალაქო სამსახურში ჩამოწერილი ბომბდამშენი Airco DH.4 შეჰმატეს და ამანათების ავიაგადაზიდვებს მიჰყეს ხელი. მეორე მსოფლიო ომის დღეებში კომპანიის ფლოტი Douglas C-47-ითა და Douglas DC-3-ით გაძლიერდა. 1950-ში კი Starbrook Airlines-ის თვითმფრინავმა პირველად გადაუფრინა ოკეანეს და მატერიკიდან ჰოულენდის კუნძულზე გადაისროლა ტვირთი.

1951 წელს ძმებმა, ემილ და ჯექ ლეროიმ საკუთარი აეროდრომის გაფართოება გადაწყვიტეს და მშენებლობამა და დიზაინმა ისე გაიტაცა, რომ ავიახომალდის ნაწილებისგან დამზადებული ავეჯის კოლექციაც კი შექმნეს. Starbrook Airlines Furniture Collection, სხვა დანარჩენთან ერთად, თვითმფრინავების მცირე ზომის მაკეტებსაც მოიცავდა. ასე დაიწყეს ძმებმა დიდი ავიახომალდების პაწია ასლების დამზადება. 1998 წელს კი, სისხლის ყივილი მაინც სულ სხვაა და, ჯექ ლეროიმ ბელგიური შოკოლადისგან დამზადებული თვითმფრინავები გურმანთა და ესთეტთა სამსჯავროზე გამოიტანა. მის შოკოლადს იმხელა მოწონება ხვდა წილად, რომ, ფიროსმანისა არ იყოს, რაცრამებადა ყველაფერი გაყიდა და შოკოლადის წარმოებას მიჰყო ხელი.

Continue reading

ღიმილიკები ამაზონისგან

“ამაზონის” დამფუძნებელი ჯეფ ბეზოსი რომ ყველაზე ღიმილიანი კაცია, ამაზე აკი ადრეც ვწერდი, ამიტომ სულაც არ გამკვირვებია, როდესაც ახალ საიტს ღიმილი.ამაზონ.კომი დაარქვა.

smile.amazon.com, ერთი შეხედვით, საყოველთაოდ ცნობილი ინტერნეტ-მაღაზიის იმ ძველი საიტის კლონია, პაწია განსხვავებით – თუკი “ამაზონის” მაღაზიაში საშოფინგოდ ღიმილის კარით შეხვალთ, დახარჯული თანხის 0.5%-ს კომპანია გადაურიცხავს თქვენ მიერვე შერჩეულ რომელსამე საქველმოქმედო ორგანიზაციას. მათი ჩამონათვალი უკიდეგანოა. მონიშნეთ ზედა ფანჯარაში (1) ან მოძებნეთ სასურველი ქვედა საძიებო ველის დახმარებით (2).  amazon-smile

 

Continue reading

იასამნისფერი სახლის ლამაზი დიასახლისი

მამული, ენა, სარწმუნოება. ილია

სექსი, ნარკოტიკები და როკ’ნ’როლი. იენ დიური

ღმერთი, ოჯახი და იაჰუ. მარისა მაიერი

Yahooბევრს არ გემახსოვრებათ, მაგრამ დრო იყო, ინტერნეტში შესვლისას ხალხი “გუგლს” კიარა “იაჰუს” მიმართავდა ხოლმე. Yahoo! იყო მეილი. Yahoo! იყო საძიებო სისტემა. Yahoo! იყო ნიუსფიდი და Yahoo! იყო ფოტოჰოსთინგიც. ჩემი პირველი ბლოგი(სმაგვარი)ც კი Yahoo!-ზე მქონდა. 🙂

არ ვიგონებ. ნამდვილად იყო ასეთი დრო.

შემდეგ Yahoo!-ს შეეყარა დაავადება, რასაც მარკეტოლოგები “მარკეტინგულ ახლომხედველობას” ვუძახით – როდესაც ბაზრის ლიდერი ხარ, ხშირად არც უკან იხედები, აღარც – გარეშემო და ვერ ამჩნევ, როგორ იცვლება დრო და როგორ გიახლოვდებიან კონკურენტები. ასე დაემართა Yahoo!-საც. პრაქტიკულად ყველგან, სადაც შეიძლებოდა და არ შეიძლებოდა პირველობა Google-ს დაუთმო.

ერთ წელიწადში Yahoo!-ს აქციონერებმა სამი აღმასრულებელი დირექტორი გამოცვალეს, სანამ 2012-ში უმნიშვნელოვანესი გადაწყვეტილება მიიღეს და კონკურენტი კანტორიდან გადმოიბირეს მარისა მაიერი (Marissa Ann Mayer), ვინც Google-ში 14 წელი დაჰყო და 2012 წლის 16 ივლისიდან კი Yahoo!-ს CEO და დირექტორთა საბჭოს წევრი გახდა. და დაიწყო Yahoo!-ს aggiornamento – დიდი განახლება.

Continue reading