ჭდე: დეტექტივი

როდესაც მან საფოსტო ყუთი გამოაღო და გამომცემლობა Viking Press-ის კონვერტი შენიშნა, არცკი გახარებია. “კიდევ ერთი უარი” – ასე გაიფიქრა. მიჩვეული იყო. რომ გეკითხათ, თუ რამდენმა რედაქტორმა დაუწუნა ხელნაწერი, ვერც გეტყოდათ. თხუთმეტმა? ოცმა? ოცდახუთმა? სინამდვილეში მათი რიცხვი 27 იყო… ამიტომ, თავაზიან უარსაც მიეჩვია, მაგრამ გულმა მაინც არ მოუთმინა, უჯრიდან ქაღალდის საჭრელი დანა ამოიღო და კონვერტი გახსნა. ნაწარმოები მოეწონათ და ავტორს გამომცემლობაში ელოდნენ.

ასე გაუმართლა უმუშევარ და BBC-დან სკანდალით გამოპანღურებულ ჟურნალისტს – ფრედერიქ ფორსაითს (Frederick Forsyth) და ასე გაუმართლა The Viking Press-ს, რომელმაც  ყველა დროის ერთ-ერთი საუკეთესო პოლიტიკური თრილერის, “ტურის დღის” გამოცემის უფლება შეიძინა.

Continue reading “ფორსაითის დღე”

ეძღვნება შევალიე ოგიუსტ დიუპენის ხსოვნას

ლონდონელი კერძო მაძებარი შერლოქ ჰოლმსი (Sherlock Holmes) ან, როგორც უფრო ზუსტი იქნებოდა, შერლოქ ჰოუმზი – უდავოდ ყველაზე ცნობილი მაძებარია ყველა ცნობილ მაძებართა შორის, იმდენად, რომ მისი სახელი და გვარი დეტექტივის სინონიმადაც კი იქცა. ის დანაშაულის გახსნისადმი სამეცნიერო მიდგომის მომხრე და, შეიძლება ითქვას, ფუძემდებელიც კია. არ ენდობა წინათგრძნობას, არასდროს სდევს ემოციებს (ერთადერთხელ, როცა კი გრძნობებმა გადაძალა – ის გაცუცურაკებული დარჩა, როგორც თავად უწოდებდა – “იმ ქალის” მიერ). ალკოჰოლურ სასმელს დიდად არ ეტანება. გამოუსწორებელი მწეველია და არც ნარკოტიკებზე ამბობს უარს. მუდამ საკუთარ გეგმას მიჰყვება და თავს ნებას აძლევს, კანონიერ გზასაც კი გადაუხვიოს,  თუკი ეს სამართლიანი ეჩვენება. რამდენადაც მუდამ სიკეთის მხარესაა და ბოროტებას ამარცხებს, მკითხველები ყველაფერს პატიობენ. მის მზერას, სმენასა და ყნოსვას არაფერი გამორჩება. მოწესრიგებულს ვერ დავარქმევთ – როცაკი რამე საიდუმლოს ამოხსნითაა დაკავებული, მის კაბინეტში ნამდვილი ქაოსია, რაც ძალიან აწუხებს სახლის პატრონსა და დიასახლისს, მისის ჰადსონს, მაგრამ თავად ჰოლმსს – ნაკლებად. ფენომენალური მეხსიერებისა და ენციკლოპედიური ცოდნის პატრონია, განსაკუთრებით რაც ეხება დამნაშავეთა სამყაროს, იარაღს, თამბაქოს, შესანიშნავი ქიმიკოსი და ბოტანიკოსია, კარგად უკრავს ვიოლინოზე და, საუკუნის დასალიერს მეფუტკრეობასაც კი აითვისებს.

Continue reading “ყველაზე გამჭრიახი გამოგონილი დეტექტივები”

მედიასახლ პალიტრის პროექტზე “50 წიგნი, რომელიც უნდა წაიკითხო, სანამ ცოცხალი ხარ” ხომ ყველამ იცით? ბევრმა, ალბათ, მონაწილეობაც მიიღეთ, კითხვარი შეავსეთ და წიგნებიც ჩააწიკწიკეთ კოხტად.

მე – არა.

ისე, ამ პროექტის შესახებ რომ გავიგე პირველად, სურვილი გამიჩნდა, დამეწერა პოსტი 50 წიგნზე, რომელიც არ უნდა წაიკითხო, სანამ ცოცხალი ხარ… დავიწყე კიდეც. შემდეგ მივაგდე და ქე არის ეგერ, დრაფტებში სხვა 20-იოდ მიგდებულ თუ დაუმთავრებელ პოსტს შორის.

სამაგიეროდ, სხვა პოსტი უნდა გავაცოცხლო ახლა – 50 დეტექტურ ნაწარმოებზე, რომელიც უნდა წაიკითხო, სანამ ცოცხალი ხარ. როდესაც სერ ართურ ქონან დოილზე ვწერდი პოსტს, მაშინ გადავაწყდი ამ სიას, რომელიც ინგლისური Daily Telegraph-ის ლიტერატურული განყოფილების თანამშრომლებმა შეადგინეს ორიოდ წლის წინ. დოილზე პოსტი ისედაც მეტისმეტად ვრცელი გამომივიდა, ამიტომ ეს სია იქ ვერაფრით ჩავაკვეხე. ახლა აგერ გთავაზობთ:

Continue reading “50 დეტექტივი, რომელიც უნდა წაიკითხო, სანამ ცოცხალი ხარ”

1891 წლის 4 მაისს პროფესორმა მორიართიმ შერლოქ ჰოლმსი კლდიდან  რაიხენბახის ჩანჩქერში გადააგდო. დიდი დეტექტივი დაიღუპა… მართალია, 10 წლის შემდეგ ის მკვდრეთით აღდგა, მაგრამ 1891 წლის 4 მაისს ამის შესახებ ჯერ არც პროფესორმა მორიართიმ იცოდა, არც დოქტორმა უოთსონმა და, ასე განსაჯეთ, არც სერ ართურ ქონან დოილმა. სერ ართურ ქონან დოილი (Sir Arthur Ignatius Conan Doyle, 1859 წლის 22 მაისი – 1930 წლის 7 ივლისი) შოტლანდიაში დაიბადა, წარმოშობით ირლანდიელი იყო და ცხოვრების დიდი ნაწილი ინგლისში გაატარა. იყო ექიმი და მწერალი, ფეხბურთელი და რაგბისტი, მდაბიო და რაინდი, მოკრივე და მეზღვაური, კათოლიკე და აგნოსტიკოსი, მკვლევარი და მისტიკოსი, გამომგონებელი და მოგზაური, მილიონერი და მფლანგველი… მოასწრო იმდენი, რომ ათი ადამიანის ცხოვრებას ეყოფოდა და, რაც მთავარია, შექმნა შერლოქ ჰოლმსი (თუმცა, უფრო ზუსტია – შერლოქ ჰოუმზი)  – მისი ყველაზე ცნობილი და ყველაზე საძულველი პერსონაჟი.
Continue reading “ექიმი, მწერალი, პატრიოტი”