აეროპორტში – სტრესის მოსახსნელად

კვირადღის პოსტი

ვისაც საშობაო დღეებში ლოს ანჯელესში მოუწია ფრენა, აი, ასეთი სურათის მოწმე გახდა:

მია, მეისონი, ელი და სერიჯო მგზავრებს ეგებებიან და მათი დარდის განქარვებასა და კარგ განწყობაზე ზრუნავენ.

ეს ოთხი და კიდევ სხვები (70-ზე მეტნი არიან) PUP (Pets Unstressing Passengers – შინაური ცხოველები მგზავრთა დასამშვიდებლად) პროგრამის წევრია, რომელიც ლოს ანჯელესის აეროპორტში 8 წელია უკვე მოქმედებს. ძაღლები საგანგებო წითელ ჟილეტებში არიან გამოწყობილნი წარწერით Pet Me – “მომეფერე” – იოლად რომ გაარჩიო აეროპორტში მომსახურე სხვა (საბაჟოს, პოლიციის) ძაღლებისგან, რომელთაც, როგორც წესი, “არ მომეფერო, ვმუშოაობ”-ო აწერიათ ჟილეტებზე.

ძაღლებს საგანგებო ბეიჯებიც აქვთ, სადაც მათი სახელი, ასაკი, ჯიშია მითითებული და პირადი სურვილებიც – მაგალითად, რა სასუსნავი ყვართ და სად ურჩევნიათ, რომ ეფერებიან (გთხოვთ, კუდზე არ მომქაჩოთო).

დღე-ღამის განმავლობაში რამდენიმე ძაღლი მუშაობს. ისინი ყოველ 2 საათში ერთხელ ენაცვლებიან ერთმანეთს.

ცხადია – არამხოლოდ საშობაო და სადღესასწაულო დღეებში, თუმცა, ასეთ დროს, როდესაც მგზავრთა ნაკადი განსაკუთრებით იმატებს, დიდია პასუხისმგებლობაც და ძაღლებს გამორჩეული ჯაფა აწევთ.

პროგრამის ხელმძღვანელი, ჰეიდი ჰიუბნერი ამბობს, რომ LAXPUPs 2013 წელს ექსპერიმენტის სახით დაიწყო, ამოცანას წარმატებით გაართვა თავი, იმედები სრულად გაამართლა და დიდი მოწონებით სარგებლობს. ძაღლები მგზავრების მხოლოდ სტრესის მოხსნასა და გახალისებაზე არ მუშაობენ, მათ მომვლელი (თერაპევტი) ცხოველების მომზადება აქვთ გავლილი და, საჭიროების შემთხვევაში, შეზღუდული შესაძლებლობების მქონე მგზავრებისთვის დახმარების აღმოჩენაც შეუძლიათ.

©Lord Vader. Stylish Blog. საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით. This work is licensed under a Creative Commons Attribution-NonCommercial 4.0 Unported License.

___

Twitter: LAX PUP Therapy Dogs