ძაღლები კატების ქალაქიდან

ზეითინი, ნაზარი და ქართალი – ასე ქვიათ სამ მუშკეტერს ძაღლს, რომლებიც სტამბოლში ცხოვრობენ. ქუჩაში. სტამბოლელი ქუჩის ძაღლები არიან.

მათ გარდა ამ ქალაქში 100’000-ზე მეტი ქუჩის ძაღლი ცხოვრობს, მაგრამ ეს სამი დოკუმენტური ფილმის გმირებად იქცნენ. და ახლა ისინი მოგვითხრობენ საკუთარ თავზე, სხვა ძაღლებზე. და – არამხოლოდ ძაღლებზე.

“მოხეტიალე” (Stray) ასე ქვია დოკუმენტურ ფილმს, რომელიც 2020 წელს გადაიღო ელიზაბეთ ლოუმ (Elizabeth Lo).

კი, ვიცი, რომ “მაწანწალა” უფრო შეესაბამება, მაგრამ არ მიყვარს… და ქუჩის ძაღლებს ასე არც ვუძახი.

ფილმი კარგი გამოვიდა და თორონთოს დოკუმენტური ფილმების საერთაშორისო ფესტივალზე Hot Docs მთავარი პრიზი მოიპოვა. კიდევ რამდენიმე სხვა ჯილდოზეც იყო ნომინირებული ნიუ იორქის, ხიხონის, ბერგენის, სტოკჰოლმის დოკუმენტური ფილმების ფესტივალებზე. ეკრანებზე გამოსვლა კოვიდმა შეაფერხა და დებიუტი წელს, 5 მარტს შედგა. ცუდი დასწრება არ აქვს და IMDb-ზე – 7+ რეიტინგი.

ფილმი “ძაღლის თვალითაა” გადაღებული. ეს არის ფილმი ზეითინზე, ნაზარზე და ქართალზე და სხვა სტამბოლელ ძაღლებზეც. სტამბოლში მცხოვრებ ადამიანებზე. და თავად – სტამბოლზე.

ძაღლები ამ ქალაქის მკვიდრი მაცხოვრებლები არიან. ერთხელ იყო, ქალაქი იხსნეს კიდეც (იმ დროს სტამბოლს კონსტანტინოპოლიც კი არ ერქვა ჯერ – ბიზანტიუმი იყო).

ამიტომაცაა, ეგებ, რომ დღეს სტამბოლში ძაღლებს არ ერჩიან, მიუხედავად იმისა, რომ ისლამში ძაღლი უწმინდური ცხოველია… ბევრგან თვალს მოჰკრავთ – მშრალი საკვებია დაყრილი კატებისთვის და ძაღლებისთვის, ჭურჭელი – წყლით, რომ სტამბოლელი ოთხფეხები გაუწყლოებისგან იხსნან.
რა გასაკვირია, რომ სტამბოლელი ძაღლებიც ძალიან კეთილგანწყობილნი არიან. დიდი ზომის – ნამდვილი ქოფაკები… მაგრამ – გულკეთილი ქოფაკები.
კატების ქალაქი, რომელიც ძაღლებმა გადაარჩინეს

ძაღლები სტამბოლში უყვართ, თუმცა, იყო დრო, ქალაქიდან ასახლებდნენ. მაგრამ დღეს ეს ყველა წარსულს ჩაბარდა. ავი მოპყრობისგან მათ უკვე კანონიც იცავს და სტამბოლის ახალი მერის ინიციატივით, მალე ეს კანონი კიდევ მეტად გამკაცრდება.

სტამბოლის ქუჩებში დგას ცხოველების საკვების გამცემი დანადგარები, სტამბოლში ყინვიან ზამთარს მეტროს სადგურებში იფარებენ ცხოველებს, შექმნეს მობილური აპი, რომელშიც აღრიცხულია ქალაქის ქუჩებში მცხოვრები ცხოველები, არის რამდენიმე კლინიკა, რომელიც, მინიციპალიტეტის დაფინანსებით, მოხეტიალე ცხოველებს ემსახურება, მათ შორის კლინიკა ბორბლებზე – VetBus.

ბორბლებიანი კლინიკა სტამბოლში არ მოუგონიათ – VetBus-ის იდეა სან დიეგოში გაჩნდა, მაგრამ სტამბოლშიც მოეწონათ და გადმოიღეს.

ქუჩის ცხოველებთან ერთ ქალაქში ცხოვრების, ზრუნვის, მოფრთხილების სტამბოლური მოდელი, მსურს, სხვა ქალაქებსაც გავაცნო, სხვებმაც გაიზიარონო, – უთხრა რეჟისორმა Reuters-ს.

ზეითინი თურქულად ზეთისხილია, ნაზარი – თილისმა, ქართალი – არწივი. სამივე კი სტამბოლელი ძაღლები არიან. ქალაქიდან, რომლებიც კატებს კი ეკუთვნით (მათზეც არის დოკუმენტური ფილმი) მაგრამ დღეს ძაღლებსაც ეკარგქალაქებათ.

©Lord Vader. Stylish Blog. საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით. This work is licensed under a Creative Commons Attribution-NonCommercial 4.0 Unported License.

___

‘They see them as fellow citizens’: How Istanbul’s street dogs have found a place in society
‘Stray’: Film Review

ასევე:

კატების ქალაქი, რომელიც ძაღლებმა გადაარჩინეს
გურმანი კატა, დანარჩენი ექვსი და სხვა მრავალი