ქალი საწოლ ოთახში

იტალიელი ფოტოგრაფები გაბრიელე გალიმბერტი და ედუარდო დილელე მსოფლიოს გარშემო მოგზაურობენ და ქალებს უღებენ ფოტოებს მათ ყველაზე პირად სივრცეში – საძინებელ ოთახში. “სარკეები და სარკმელები” (Mirrors and Windows) ასე ჰქვია ამ პროექტს.

გაბრიელე გალიმბერტი (Gabriele Galimberti) ტოსკანას რეგიონის ვალდიკიანადანაა. რამდენიმე დოკუმენტური ფოტო-პროექტის ავტორი და სულის ჩამდგმელია: ბავშვები და სათამაშოები (Toy Stories), ბებიები და კულინარია (In Her Kitchen), მამები, ბედნიერება, პროფესია, ლოქდაუნს მიძღვნილი ფოტოსესია შინ და გარეთ (Inside Out). მისი ფოტოები შეგხვდებათ სხვადასხვა ქვეყნის ბევრ გამოცემაში National Geographic, Geo, Le Monde, La Repubblica, Marie Claire. არის რამდენიმე წიგნის ავტორი. მონაწილეობს გამოფენებში.

ედუარდო დილელე (Edoardo Dilelle) ფლორენციიდანაა. მშობლების რჩევით იურისტობას აპირებდა, მაგრამ მალე მიხვდა, რომ ეს საქმე მისი არ იყო, მიაგდო და ფოტოგრაფიას მიყო ხელი. რეგულარულად მონაწილეობს გამოფენებსა და ფოტო-ფესტივალებში. ისიც, გალიმბერტისთან ერთად, ფოტოგრაფთა გაერთიანება Riverboom-ის წევრია.

ამ და სხვა ფოტო-პროექტების მიზანია, განსხვავებული ადამიანების ისტორია მოგვითხროს. დაგვანახოს, რომ, მიუხედავად მრავალი ფერისა, ეს დედამიწა ჩვენი საერთო სამყუდროვეა და, სინამდვილეში, სულაც არ ვართ ისე განსხვავებულები, როგორც გვგონია.

გოგონების საძინებლებში შეჭყიტვა, Riverboom-ელ ფოტოგრაფთა საყმაწვილო გატაცება იყო, ალბათ. ახლა, როდესაც წამოვიზარდეთ, განვიზრახეთ, ეს ოცნება რეალობად გვექცია. ხუთი კონტინენტი შემოვიარეთ, რომ გვენახა, თუ სად სძინავთ გოგონებსა და ქალებს. აღმოვაჩინეთ, რომ საძინებელი გაცილებით მეტია, ვიდრე უბრალოდ ოთახი, სადაც სძინავთ – ეს არის ადგილი, სადაც გოგონები კითხულობენ, უყვართ, ოცნებობენ, მუშაობენ და თამაშობენ.
გაბრიელე გალიმბერტი და ედუარდო დალილე

ქალების სერიაში ქართველი ქალის ფოტო არ შემხვდა, თუმცა, სხვა სერიებში არის – თბილისელი ელენე საყვარელ სათამაშოებთან ერთად.

და ნატალი სამზარეულოში ხინკლის ინგრედიენტებთან ერთად და – შედეგით.

ფოტოგრაფების (ამ და) სხვა პროექტების სანახავად:

• გაბრიელე გალიმბერტი
• ედუარდო დილელე

© Lord Vader. Stylish Blog. საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით. This work is licensed under a Creative Commons Attribution-NonCommercial 4.0 Unported License.

___

Riverboom