ჩვენი დროის ეკლესია

დამჭკნარი ვარდის სახელიღა რჩება,
გვრჩება შიშველი სახელები.
უმბერტო ეკო. “ვარდის სახელი”
ხათუნა ცხადაძის თარგმანი. “დიოგენე”, 2011

ელიას მთაზე სამების ტაძრის აგება რომ გადაწყვიტეს, გამოაცხადეს კონკურსი.  მაკეტებს შორის რამდენიმე ჩვენი თვალისთვის უჩვეულოც იყო, განსხვავებული, მაგრამ უპირატესობა არჩილ მინდიაშვილის პროექტს მიანიჭეს, რომელიც არის, რაც არის. ჩვეული, მძიმე და მოსაწყენი. არქიტექტურა კი ეპოქას უნდა ასახავდეს. მისდევდეს და წინ უსწრებდეს კიდეც. 21-ე საუკუნეში აგებულ შენობას 21-ე საუკუნის რომაა, ეგ უნდა ემჩნეოდეს. როგორც 21-ე საუნეში დაწერილ წიგნს ემჩნევა. ნახატს ემჩნევა. მუსიკას ემჩნევა. თუმცა, ეკლესია სხვა რამ არისო, იფიქრეს მაშინ, ალბათ… იესო თავად იყო რეფორმატორი და, არ მგონია, სიახლისა შეშინებოდა.

1992-96 წლებში, თითქმის იმ დროს, ჩვენ რომ სამებას ვაშენებდით, შვეიცარელებმაც ააგეს მოგნოში წმინდა იოანე ნათლისმცემლის სახელობის ახალი ტაძარი. იმ ადგილას მე-17 საუკუნის ძველი ეკლესია იდგა. 80-იანების შუაწელს ზვავმა დაანგრია. გამოაცხადეს კონკურსი და მარიო ბოტას პროექტი შეარჩიეს.

როგორც ფოტოებიდან ჩანს (სამწუხაროდ, ნამყოფი არ ვარ და ლაივში არ მინახავს) ტაძარი “უჩვეულოდ” გამოიყურება და მოუმზადებელი ტურისტი, შეიძლება, ვერც მიხვდეს უცებ, რომ ტაძარია. ძალიან განსხვავდება ქალაქის სხვა შენობებისგან, მაგრამ საუკეთესოდ არის მისადაგებული მწვერვალებს, როგორც იმ მთების ფიქრი. და არაჩვეულებრივ ხედსაც “არ აფუჭებს”.

აგებულია რუხი გრანიტითა და თეთრი მარმარილოთი, რომლის საბადოც იქვე, მოგნოს მეზობლად მდებარეობს. გადახურვა – მინისაა, რომ იყოს ნათელი და ჩრდილებისა და შუქურთმების შეკონება. მაგიერ – უსარკმელოა კედლები. მარიო ბოტამ იმ მე-17 საუკუნის ტაძართანაც გადო ხიდი – და ზვავს გადარჩენილი ძველი ზარები დაკიდა. ახალი ტაძრის სიმაღლეც, 17 მეტრი, “ძველია” – იმ ძველი ტაძრის სამრეკლო იყო ამ სიმაღლის.

მარიო ბოტა (Mario Botta) შვეიცარიის ქალაქ მენდრიზიოდანაა. ვენეციის არქიტექტურის ინსტიტუტის კურსდამთავრებული.

მოგნოს ტაძარი მის მიერ აგებული ერთადერთი საკულტო შენობა არ არის. ბოტას პროექტითაა აგებული წმინდა კორბინიანის სახელობის ტაძარი ფრანგულ ევრიში, თელ ავივის უნივერსიტეტის მთავარი სინაგოგა და ებრაული მემკვიდრეობის ცენტრი. ბოტა არის სან ფრანცისკოს თანამედროვე ხელოვნების მუზეუმის და ქალაქ შარლოტის ბეხტლერის თანამედროვე ხელოვნების მუზეუმის არქიტექტორიც. მისი აგებულია ქალაქ რუსტის ევროპა-პარკის გუმბათიც.

© Lord Vader. Stylish Blog. საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით. This work is licensed under a Creative Commons Attribution-NonCommercial 4.0 Unported License.

___

Church of Mogno (with 360 Panoramic View)

Why Architect Mario Botta Is Having a Major Moment