როდესაც ადამიანს კარგი მუსიკა და კარგი ლიტერატურა უყვარს და კარგად ხატვაც ეხერხება, რას აკეთებს?
ასეთ რამეებს ხატავს. 🙂
ნახატი ბოსთონში, Northeastern University-ის კამპუსის კედელზეა. ავტორი ჯეფ აეროზოლია (Jef Aérosol) იგივე ჟან-ფრანსუა პერვუა (Jean-François Perroy) – ფრანგი მხატვარი, გრაფიკოსი, სთრითარტერი. ნანტში დაიბადა, ამჟამად ლილში ცხოვრობს და მისი პირველი ნამუშევრები ქალაქ ტურის შენობებზე გამოჩნდა 80-იანებში. პერვუა ფრანგული სთრითარტის პიონერია. ვანდალები და ხულიგნები რომ ეგონათ. პოლიცია რომ დევნიდა. მათ ნამუშევრებს რომ შლიდნენ. ათეთრებდნენ. შემდეგ ნელ-ნელა გაუგეს და დააფასეს. ერთ-ერთი პირველი, ვინც სახელი გაითქვა. ვისი ნახატებიც კერძო კოლექციებსა და გალერეებშია. ვისაც პატიჟებენ და შენობებს უთმობენ, რომ დახატოს რამე.
პორტრეტებზე მუშაობა უყვარს. ბევრი მისი ნახატი ტილოზე ან პანოზეც არსებობს, არამხოლოდ – კედელზე.
პლუტარქესი არ იყოს, ძალიან უყვარს პარალელური პორტრეტები. ხშირად – პარადოქსალურიც.
მარცხენა პერსონაჟს, ალბათ, ყველა იცნობთ – ბრიუსელელი მფსმელი ბიჭუნაა, მარჯვნივ კი – მილუ, ბელგიელი მწერლის, ერჟეს კომიქსების პერსონაჟი.
ჯეფ აეროზოლის ნახატი ამშვენებს რობერტ მიუზილის ლიტერატურული მუზეუმის კედელს.
რამდენიმე წიგნის ავტორია. დოკუმენტური ფილმის გმირი. მისი სთრითარტი მარტენ პროვოს ფილმში “საითკენ მიიწურება ღამე” (Où va la nuit) “მონაწილეობს” – საგანგებოდ დაუკვეთა რეჟისორმა.
“კულტურათა დიალოგის” ფარგლებში გამართული მრავალი სთრითარტ-ფესტივალის მონაწილეა.
წითელი ისარი ჯეფ აეროზოლის ხელმოწერაა. ბევრ მის ნამუშევარზე შეამჩნევ. თუ ქუჩაში მიდიხარ და წითელისრიანი ნახატი შემოგხვდება – ჟან-ფრანსუა პერვუაა.
ან – ვინმე მიმბაძველი. 😉
© Lord Vader. Stylish Blog. საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით. This work is licensed under a Creative Commons Attribution-NonCommercial 4.0 Unported License.
___
Stylish Blog 