დღეს სხვა პოსტი მქონდა მზად, მაგრამ გლეიზერი გარდაიცვალა. ერთ-ერთი ყველაზე დიდი გრაფიკოსი დიზაინერი. და უდავოდ ყველაზე ცნობილი. თუ – ცნობადი.
გლეიზერის შემოქმედება ყველამ იცის. ყველას აქვს ნანახი. თუ ორიგინალი არა – კლონი მაინც.
ლოგიკას ის ღონე არ აქვს, რაც – ინტუიციას.
მილთონ გლეიზერი
ხშირად ხდება, იმ შედევრს უფრო ვაფასებთ, რომლის შექმნის მაგიას ვერ ვწვდებით. ძნელია, ამოხსნა, როგორ შექმნა ადამიანმა “ულისე”. როგორ აქვს მოწყობილი ტვინი ადამიანს, “ულისე” რომ მოიფიქრა. ან “ანდალუზური ძაღლი” გადაიღო. ან “მე ძლიერ მიყვარს იისფერ თოვლის ქალწულებივით ხიდიდან ფენა”-ო რომ დაწერა. თავად გალაკტიონს კი აკაკი უყვარდა ყველაზე მეტად. ის აკაკი, ასეთ ლექსს ხომ მეც დავწერო, რომ გაფიქრებინებს. ახალგაზრდობაში, სანამ აბდალი ხარ. 🙂 სანამ მიხვდები, რომ ამ მოჩვენებით სიმარტივეში და სისადავეშია გენია.
ასეთია გლეიზერიც. მისეულ მიგნებებსა და იდეებს ბევრი სხვა დიზაინერის შემოქმედებაში ამოიცნობ. გლეიზერთან დიალოგი იოლია. მისი ნამუშევრები ინტერპრეტირების საშუალებას გაძლევს. ზოგჯერ პლაგიატი გამოდის, თუმცა რემინისცენციაა ხშირად. ესეც გენიის ნიშანია.
დიზაინის ნიმუშს სამი პასუხი აქვს: კი. არა. და ვაუ! მიზნად ვაუ უნდა დაისახო.
მილთონ გლეიზერი
მილთონ გლეიზერი (Milton Glaser) უნგრელი ებრაელების შთამომავალია. ნიუ იორქში დაიბადა და მთელი ცხოვრება და შემოქმედება საყვარელ ქალაქს უძღვნა. მუსიკისა და ხელოვნების მანჰეთენის სკოლისა და ქუფერის მეცნიერებისა და ხელოვნების ინსტიტუტის კურსდამთავრებულია. ხელმძღვანელობდა ჯერ Push Pin Studios-ს, 1974 წლიდან კი Milton Glaser Inc.-ს. 1968 წელს ჟურნალი New York დააფუძნა. დაგვიტოვა უამრავი პოსტერი, მუსიკალური ალბომისა და წიგნის ყდა, ლოგო. რამდენიმე ფერის, ფორმისა და ფიგურის კომბინირებით შეძლო 60-იანების განწყობას გადმოცემა. წარმატებული იყო შემდგომ ათწლეულებშიც და მუშაობას განაგრძობდა 21-ე საუკუნეშიც, თუმცა, მის ნამუშევრებში ყოველთვის იგრძნობა 60-იანელობა – რევოლუციური იდეებისა და ცვლილებების ეპოქა დიზაინსა და მოდაში.
უამრავი რამის კეთება მიტაცებდა და ყოველთვის მაინტერესებდა იმის ნახვა, თუ სადამდე შევძლებდი, გამეხსნა ჩარჩოები.
მილთონ გლეიზერი
იმათ შორის, ვინც მასზე გამორჩეული გავლენა იქონია, გლეიზერი ასახელებდა მარსელ დიუშანს, რენე მაგრიტს. სწავლობდა ჯორჯო მორანდისთან. მეგობრობდა ჟან-მიშელ ფოლონთან (ერთობლივი ალბომიც აქვთ სადაც ნახატს იწყებდა ერთი და ამთავრებდა მეორე – Conversation ქვია).
ეჭვი უცდომლობაზე უპირატესია.
მილთონ გლეიზერი
მილთონ გლეიზერის პერსონალურ გამოფენას 1975 წელს უმასპინძლა MoMA-მ, 1977 წელს კი – პომპიდუს ცენტრმა. მას შემდეგ კიდევ არაერთგზის დაუთმეს მსოფლიოს ყველაზე პრესტიჟულმა გალერეებმა დარბაზები.
მისი ჯილდოებისა და პრიზების ჩამოთვლას პოსტი ვერ დაიტევს. მათ შორის არის დიზაინის ეროვნული ჯილდო (National Design Award) და ეროვნული მედლი ხელოვნების დარგში მიღწევებისთვის (National Medal of Arts).
სხვათაშორის – ობამას წინასაარჩევნო პოსტერი HOPE გლეიზერს არ დაუხატავს, თუმცა მისი პოსტერებით შთაგონებული ნამუშევარია.
© Lord Vader. Stylish Blog. საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით. This work is licensed under a Creative Commons Attribution-NonCommercial 4.0 Unported License.
___
Stylish Blog 