How-To: Fake vs. Real

არ მეგონა, ეს სარჩევი თუ საინტერესო იქნებოდა. მარტივი ამბავი მგონია – მყიდველმა ყოველთვის იცის, ფეიქს ყიდულობს თუ ნაღდს, მაგრამ ამასწინათ მეგობართან ვლაპარაკობდი და, თურმე, არ ყოფილა ყოველთვის ასე. შეცდომები მოსულა. ვცადოთ, არ შევცდეთ და არ დაგვაბოლონ. სულ ესაა ამ პოსტის დაწერის მიზანი. არ ვაპირებ, ვინმე დავამუნათო ფეიქის ყიდვისთვის ან მოვუწოდო, გინდათუარა ნაღდი იყიდე ოთუსბირად-თქო. ეს პოსტი მისთვისაა, ვისაც არ უნდა ფეიქის ყიდვა და არ სურს, მოტყუვდეს ან თავი მოიტყუოს. და არც ის სურს, იყიდოს ფეიქი ვითომ იაფად, მაგრამ ფეიქისთვის – ძვირად.

პოსტი, ცხადია, ტანსაცმლის ბრენდებზეა. სხვას – არ შევეხები.

ვრცელი შესავალი გამომივიდა. 🙂 გადავდივარ საქმეზე.

• კერვის სტანდარტი და ერთი სტილი

ბრენდს, რომელიც საშუალო-ზედა კატეგორიაშია და კიდევ ზემოთ, ტანსაცმლის კერვის თავისი გამორჩეული სტანდარტი აქვს. იოლად ამოსაცნობი. ფეიქმახერი ბევრია – ამიტომ ფეიქის სტანდარტი განსხვავებულია. ერთი ბრენდის ერთსა და იმავე ან სხვადასხვა მოდელს თუ აიღებ დახლიდან და დააკვირდები – ორიგინალის შემთხვევაში კერვის სტანდარტი იქნება იდენტური, ფექის შემთხვევაში – განსხვავებული. ორიგინალის კერვის ხარისხი იქნება მაღალი – ჩაგვირისტებული.

სიმარტივისთვის ავიღოთ ისეთი რამ, ყველას რომ აქვს გარდერობში – პერანგი. არის ერთი მარტივი მეთოდი – აიღო და დააკვირდე საყელოს, სადაც ნაკერის ლიანდაგი (ასე ქვია ქართულად stitch-ს) გადის. მეჩხერი არ უნდა იყოს, მიახლოებით 3.3 სმ-ში მინიმუმ 15 ბიჯი მაინც უნდა დათვალო. ეს მაღალი ხარისხის კერვის ნიშანია.

მხრები, საყელო, მანჟეტები, გვერდები – ყველგან ჩადგმული იქნება დამატებითი ნაჭერი სიმკვრივისთვის. იმისთვის, რომ არ მოიფლაშოს, საყელო არ მოექცეს, ფორმა არ დაკარგოს. მაღალი ხარისხის ბრენდის კერვის ხარისხი არის ამგვარი და არავითარ შემთხვევაში – სხვა.

დააკვირდი პერანგის ბოლოს, სამკუთხა ნაჭრები, რაც, შეიძლება, მხოლოდ დეკორატიული დანიშნულებისა გვგონია (ნაწილობრივ, კიბატონო, ამადაც გამოდგება) დამატებითი კომფორტისა და კონსტრუქციის სიმყარისთვის არის. კუთხოვანას (gusset) ეძახიან და აუცილებელი ელემენტი და ხარისხიანი კერვის ნიშანია.

თავამოჩრილი ძაფები. ესეც დაბალი ხარისხის კერვის უტყუარი ნიშანია.

თუ პრინტი აქვს, ის იქნება სიმეტრიული და არა – აცდენილი. თუ – ზოლები, ზოლი ზოლში უნდა გადადიოდეს. დააკვირდი მკერდზე, ჯიბეებზე, ზურგზე, მანჟეტებსა და მხრებზე.

თუ საყელოს ტიპი ამას ითხოვს, ფაფრფლებში (ფრთებში) იქნება პლასტმასის ან მეტალის სამაგრები, კუთხეებში რომ არ შეიკეცოს და არ შეტყდეს. ამასთან, უკეთესია, თუ ამ სამაგრის ამოღება შეიძლება, არ არის შიგ ჩაკერილი (ეს მცირე დეტალი მაღალი სტანდარტის დამატებითი ნიშანია და მწარმოებელმა რომ კლიენტზე იზრუნა).

• ღილები

ღილები სიმეტრიულად იქნება განლაგებული. ყველა – ერთ ხაზზე და ერთის მსგავსად.

ღილის საკინძეები – კარგად ამოგვირისტებული. სხვა შემთხვევაში, ისინი ძალიან მალე მოირღვევა და პირს მოაღებს, არც ერთი მაღალი დონის ბრენდი ასე არ კერავს.

• ზიპერი (ელვა-შესაკრავი)

დიდი ალბათობით მაღალი ხარისხის ბრენდი გამოიყენებს YKK-ს. ეს არ არის 100%, მაგრამ მეტწილად – ასეა. დააკვირდი. რა არის YKK ამაზე, ადრე დავწერე.

• იარლიყი, ლოგო

ეს უმნიშვნელოვანესი ელემენტია. ის იქნება ერთნაირი. აიღე ერთი და იმავე ბრენდის რამდენიმე პერანგი ან შარვალი ან ქურთუკი და შეადარე. თუ მოდელი იდენტურია – ლოგოც და ლეიბლიც იქნება იდენტური. ერთი ფერის, ერთსა და იმავე ადგილას განლაგებული. თუ სხვადასხვა მოდელია – განსხვავება შეიძლება იყოს ფერში ან განლაგებაში, მაგრამ სტილი, შესრულების მანერა იქნება იოლად ამოსაცნობი.

ამაზე დეტალურად ვწერდი ამ პოსტში.

• მარკირება და კოდი

იარლიყზე, სადაც შემადგენლობა, რეცხვის და დაუთოების რეჟიმი და მწარმოებელია მითითებული, დატანებული უნდა იყოს ციფრებისა და ლათინური ასოებისგან შემდგარი კოდი. ეს კოდი იოლად იგუგლება. მსგავსი კოდის საქონელი იქნება ბრენდის ოფიციალურ ონლაინ მაღაზიაში და ონლაინ კატალოგებში. და ის იქნება იდენტური იმისა, რომელსაც გუგლავთ – ცხადია, თუ ფეიქი არ გიჭირავთ ხელთ.

რა თქმა უნდა, ფეიქმახერებსაც შეუძლიათ “გადაშუშონ” ეს მარკირება, მაგრამ ყოველთვის არ იწუხებენ თავს და შესამოწმებლად მაინც ღირს.

• ტყავეული

ტანსაცმლის ყველა კატეგორიაზე შეიძლება ცალ-ცალკე თქმა, მაგრამ დაუსრულებელი პოსტი გამოვა. ტყავზე ვიტყვი ორი სიტყვით. ნამდვილ ტყავს თუ დაასველებ ის ოდნავ დარბილდება და გამუქდება, იმიტაცია – ფერს არ იცვლის. თუ ხელისგულებს შორის მოაქცევ, ტყავი სხეულის სითბოს იოლად “ისესხებს” და გათბება, იმიტაცია კი – არა. ხელოვნური მასალა ბევრად ჰომოგენურია, ტყავის ზედაპირი კი ფოროვანია და ეს ფორები ასიმეტრიულადაა გაბნეული. თუ ლეიბლი ტყავიაო ამტკიცებს და ტყავის ნიშნები არ აქვს – ფეიქია (ტყავზე ცალკე How-To პოსტიც მაქვს: ტყავი, რომელიც გაცვია).

• ზოგადი რჩევები

თუ მაღაზიაში ერთი რომელიმე ბრენდის ერთი პროდუქცია მაინც არის, რომელიც ეჭვს იწვევს, რომ ფეიქია, დიდი ალბათობით ასეთივე ფეიქი იქნება სხვაც.

ფასი მნიშვნელოვანი ინდიკატორია. ყველა ფასდაკლებას აქვს თავისი ზღვარი. არ არსებობს ბუნებაში მექანიზმი, რომელიც საშუალებას მოგცემს, რაღაც იყიდო საბაზრო ფასზე რამდენიმეგზის იაფად. ვერანაირი აუთლეთი (მითუფრო ჩვენთან, რომელიც სინამდვილეში არანაირი აუთლეთიც არაა – კლასიკური აუთლეთი სულ სხვა რამეს ქვია) ამას ვერ იზამს. ამიტომ ფასიც არის ინდიკატორი. პირველ ფილტრად გამოდგება – ღირს თუ არა დროის დაკარგვა და ხარისხის შემოწმება.

ცხადია, ე.წ. მეორადები, გაკოტრებული ბრენდების (ბანკროტ და დახურულ წარმოებებს ვგულისხმობ) ნარჩენების ამოყიდვა, “აღდგენილ-შეკეთებული” საქონელი (კი, ტანსაცმელსაც ეხება, მარტო ტექნიკას კიარა) ცალკე ამბავია. ამაზე არ ვწერ.

ამოჩრილი ძაფები, ღრანჭმოქცეული, ოკრო-ბოკრო ნაკერი ფეიქის უტყუარი ნიშანია. თუ მაღაზია ფეიქ პერანგს ყიდის, დიდი ალბათობით შარვალიც, ქურთუკიც და ფეხსაცმელიც ფეიქი იქნება. და – პირუკუ.

და ისევ გავიმეორებ, რაც ზემოთ დავწერე – ორიგინალ პროდუქციას კერვის ერთი სტილი და სტანდარტი ახასიათებს. ყველაზე მარტივი გზაა, აიღო ერთი ბრენდის რამდენიმე ტანსაცმელი, დადო გვერდიგვერდ და დააკვირდე – ერთი იგივე მოდელი ყველა იქნება იდენტური. სხვადასხვა მოდელებს ექნებათ გამოხატულად იდენტური ნიშნები, ერთი კერვის სტანდარტი, სტილი, ლეიბლინგი. განსხვავებები პრინტების, ლოგოს, ლეიბლის და ა.შ. შემთხვევაში = ფეიქს.

© Lord Vader. Stylish Blog. საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით. This work is licensed under a Creative Commons Attribution-NonCommercial 4.0 Unported License.

___

P.S.

რაც ეხება აუთლეთს – ის, რაც ჩვენთან ასე მომრავლდა და ყოველ ფეხის ნაბიჯზეა, სინამდვილეში არანაირი აუთლეთი არაა. აუთლეთი კონკრეტულ რაღაცას ნიშნავს, კონკრეტული მიზნით და მიზეზით შეიქმნა და მუშაობის, მომარაგების და ვაჭრობის თავისი პრინციპი აქვს. მწარმოებლებს, ბრენდებს და მათ დისტრიბუტორებს ოფიციალური აუთლეთები აქვთ ხოლმე (ჩვენთანაც არის, მაგალითად “დრესაფს” აქვს აუთლეთი), თუმცა ეს ცალკე პოსტის თემაა.