ოთხი ფოტოგრაფის ერთი ქალაქი. ფოტო მესამე

ფოტო მესამე: საბინე უეისი

არ მიყვარს წვიმა. ვინც სათვალეს ატარებს, გამიგებს. 🙂 საბინე უეისის პარიზში ხშირად წვიმს. ლამაზია და მყუდრო წვიმიანი პარიზი, როცა უეისი უღებს ფოტოს.

მამას, წარმატებულ ქიმიკოსს სურდა, მის კვალს გაყოლოდა, მაგრამ გოგონას თვალი უფრო გამახვილებული ჰქონდა, ვიდრე გონება (თავად ამბობს). ერთ მშვენიერ დღეს შემოაჯდა ველოსიპედს და სკოლა მიატოვა – ასე იგონებს საბინე უეისი (Sabine Weber/Weiss) შვეიცარელი ფოტოგრაფი, ვინც ცხოვრების დიდი ნაწილი პარიზში გაატარა, იქ შეხვდა მომავალ მეუღლეს, ამერიკელ მხატვარ ჰიუ უეისს, პარიზში ცხოვრობს დღესაც და უკვე საფრანგეთის მოქალაქეა.

რვა წლისა იყო, პირველი ფოტოკამერის თანხა რომ შეაკოწიწა – მთელი წელი აგროვებდა ჯიბის ფულს. ქიმია-ქიმიად, მაგრამ მამამ ფოტოგრაფიის შესწავლაშიც ძალიან შეუწყო ხელი. ფრედ ბუასონასთანაც (ცნობილი შვეიცარელი ფოტოგრაფია) უშუამდგომლა და უეისმა მთელი 4 წელი იმუშავა მის სტუდიაში. 1946 წელს რეკომენდაციებით ხელდამშვენებულმა ბედის საძებნელად პარიზს მიაშურა და მოდის სახელგანთქმულ ფოტოგრაფთან, ვილი მეივალდთან შეგირდად დადგა. უეისი ხელოვნების სხვადასხვა სფეროს წარმომადგენლის ბევრი ფოტოპორტრეტის ავტორია: ლიტერატურის, მუსიკის, ფერწერის, მოდის კორიფეების.

1950-ში რობერ დუანომ სააგენტო Rapho-ს ფოტოკორესპონდენტად მიიწვია.

საბინე უეისის პარიზი პირველ ყოვლისა ბავშვებისაა. მეორე მსოფლიო ომის შემდგომი, მშვიდობას დაწაფებული თაობის.

უეისის ნამუშევრების დიდი ნაწილი ლოზანის ფოტოგრაფიის მუზეუმის Musée de l’Élysée-ს დარბაზებშია გამოფენილი.

მაგრამ გამიმართლა და ჩემს პარიზში ყოფნას პომპიდუს ცენტრმა ფოტოგრაფის ფოტოების რეტროსპექტივა დაამთხვია.

საბინე უეისი ხელოვნების დარგის ყველაზე პრესტიჟული ხელოვნებისა და ლიტერატურის (Ordre des Arts et des Lettres) ორდენის ჯერ კავალერი (1987 წელს), 1999 წელს კი ოფიცერი გახდა. 2010 წელს ღირსების ორდენითაც (Ordre national du Mérite) დააჯილდოვეს.

© Lord Vader. Stylish Blog. საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით. This work is licensed under a Creative Commons Attribution-NonCommercial 4.0 Unported License.

___

Rediscovering the Genius of Sabine Weiss, the Last Humanist Photographer

Sabine Weiss

***
ასევე
ოთხი ფოტოგრაფის ერთი ქალაქი (ფოტო მეორე)
ოთხი ფოტოგრაფის ერთი ქალაქი (ფოტო მეოთხე)