უფასო ლუდი და სპორტული ცხოვრება

ჯანსაღ ცხოვრების წესს მისდევ? დარბიხარ ყოველ დილით (ზოგჯერ – დილა-საღამოს)? უპირატესობას ანიჭებ “ნიუ ბალანსის” სპორტულ ფეხსაცმელს? (ეს ბოლო პუნქტი აუცილებელი პირობა არაა. სასურველი კია, იმჰო).

კარგი ამბავი მაქვს – ძუნძულით დაფარული კილომეტრები შეგიძლია გადაცვალო… ლუდში!

მიდიხარ პაბში, აჩვენებ მობილურს – აპში დათვლილ მანძილს და ბარმენი ლუდს ჩამოგისხამს. უფასოდ – კილომეტრების ფასად.

რაც მეტია კილომეტრი – მით მეტია ლუდი.

ეს მოიფიქრეს კომპანია New Balance-მა, აპლიკაცია Strava-მ, ლუდის პაბმა The Runaway-მ და მუნიციპალიტეტმა…

სამწუხაროდ, ჩვენმა მუნიციპალიტეტმა – არა. ლონდონისამ. და აქციაც ლონდონის მარათონის პოპულარიზაციას და მეტი მორბენლის მიზიდვას ემსახურება.

იმის ნაცვლად, რომ შაბათი დღე პაბში გაატარო ლუდის კათხით ხელში, არ ჯობია, გახვიდე გარეთ და ერთი გულიანად გაირბინო? წონის დაკლებისთვისაც კარგია, სწრაფი მეტაბოლიზმისთვისაც, ჯანმრთელობისთვისაც. მერე ნარბენალი, წახვალ პაბში და ის ლუდი სად გაგექცევა. ფულსაც დაზოგავ… ჯიბისთვისაც კარგი ყოფილა.

არ იქნებოდა ურიგო, ჩვენც რომ გადმოგვეღო.

ხინკალში გადავცვლიდი, მაგალითად.

© Lord Vader. Stylish Blog. საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით. This work is licensed under a Creative Commons Attribution-NonCommercial 4.0 Unported License.

___

Exchange Running Miles for Free Beer