ვიეტნამში ნამყოფი არ ვარ, მაგრამ ქუჩაში ზღვის პროდუქტით მოვაჭრეებს კარგად ვიცნობ – ბევრი მინახავს და ბევრგან შემხვედრია. ჩვენთანაც. როდესაც უამრავ მეთევზეს გაუშლია გვერდიგვერდ დახლი, ძნელია, საუკეთესოს ამორჩევა და მათაც უჭირთ კლიენტის ყურადღების მიპყრობა. ხერხი და ღონე ყველას სხვადასხვა აქვს, უნარი და მიხვედრილობა, მაგრამ ზოგს ისეთი შეგირდი ჰყავს – სხვებისგან გამორჩეული.
ვიეტნამელმა ლე ქუოკ პონგმა კატა დაიმეგობრა, სახელად დოგი. 
ერთი ძველი საბჭოთა მულტფილმისა არ იყოს, კატა რომელსაც ძაღლი ჰქვია, უსიამოვნებებს გადაეყრებაო, მაგრამ დოგი თევზით მოვაჭრეს გადაეყარა და სამი წელია უკვე სარფიანად ვაჭრობენ ზღვის პროდუქტით.
დოგის სახელი ვიეტნამს გასცდა და მასთან ფოტოს გადასაღებად მეზობელი ქვეყნებიდანაც კი ჩამოდიან. დოგი ფოტოზე უარს არვის ეუბნება, შენაძენის გარეშეც არვის უშვებს. რაც დოგი შევიამხანაგე, ჩემი ბიზნესი კარგად მიდისო – ამბობს პონგი.
დოგი ადგილობრივი სელებრითია. ინსთაგრამის გვერდიც აქვს და სხვადასხვა პრეზენტაციებსა და ივენთებზეც ეპატიჟებიან.
მისთვის ტანსაცმელს ვიეტნამელი დიზაინერები ქმნიან და მოდების ჩვენებებშიც მონაწილეობს.
თუ ვიეტნამში მოგიხდათ ჩასვლა – კი იცით ახლა, თევზი და კიბორჩხალა ვისგან უნდა შეიძინოთ.
© Lord Vader. Stylish Blog. საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით. This work is licensed under a Creative Commons Attribution-NonCommercial 4.0 Unported License.
___
Meet the Cutest Fish Vendor in Vietnam
Stylish Blog 