ქალები სტადიონზე

volume 1

ქალები ფეხბურთის სტადიონზე იშვიათად დადიოდნენ. ადრე. დღეს კაცებიც აღარ დავდივართ და არ ვიცი, როგორია ქალი-გულშემატკივრების საქმე. სპორტის სასახლეში კი ყოველთვის ბევრი ქალი-გულშემატკივარი იყრიდა თავს. იმ დროს, თბილისის “დინამო” რომ კალათბურთში ევროპის ჩემპიონთა თასის მფლობელი გახდა და მერეც. ყოველთვის. ახლაც ასეა. საიდან ეს განსხვავება? ალბათ იმიტომ, რომ გოგონებს მაღალი ბიჭები მოსწონთ. 🙂

მაგრამ მსოფლიოში ფეხბურთს ბევრი ცნობილი ქალი გულშემატკივარი ჰყავს. გამორჩეული გარეგნობის. სტადიონზე, ხშირად, სილამაზის კონკურსის გამართვაც შეიძლება. 🙂 მაგრამ ახლა სხვებზე დავწერ – იმათზე, ვისთვისაც ფეხბურთი პროფესიონალური ინტერესის საგანია. ქალ ჟურნალისტებზე, რომელთა გამორჩეულ გარეგნობას ფეხბურთის ნიუანსების ჩინებული ცოდნაც კი ვერ ფარავს.

კოლუმბიელი მირელლა ხრისალესი (Mirella Grisales) Telemundo Sports/NBC Universal-ის ჟურნალისტია. 38 წლისაა. Deportivo Independiente Medellín-ისა და მადრიდის “რეალისა” გულშემატკივარია. ერთხელ, კარგა ხნის უკან, ყველაზე სექსუალურ ლათინოამერიკელ ჟურნალისტებს შორის დაასახელეს და მას შემდეგ ამ სიის მუდმივი ბინადარია და არ ტოვებს. 🙂

მარინა გრანსიერა (Marina Granziera) კოლუმბიური Blu Radio-სა და Caracol TV-ს სპორტული ამბების მიმომხილველია.

ერიკა ფერნანდესი (Erika Fernández) Fox Sports-ის ჟურნალისტია, კოლუმბიელია და მექსიკაში ცხოვრობს. კოლუმბიისა და მექსიკის ნაკრებების მხარდამჭერია, კლუბებს შორის მისი რჩეული მექსიკური Cruz Azul-ია. ერიკა ველური ბუნების დამცველია და WWF-ს ერთ-ერთი აქტიური მხარდამჭერი. ❤

მისი კოლეგაა 35 წლის ხიმენა სანჩესი (Jimena Sanchez), მექსიკელია და, იმედი მაქვს, გულში მაინც მექსიკის საფეხბურთო ნაკრებს გულშემატკივრობს, თორემ ამ “საფეხბურთო” პოსტში ვერ ჩავსვამ. ღიად კი ამერიკული ფეხბურთის Oakland Raiders-ის ფანია… და ჟურნალი Maxim “მექსიკელ კიმ კარდაშიანად” მოიხსენიებს.

ყოფილი მის სამყარო მექსიკიდან მარისოლ გონზალესი (Marisol González) Televisa Deportes-ის სპორტული ამბების წამყვანია.

“კრუზეიროს” გულშემატკივარი და “ვარსკვლავური ომების” დიდი ფანია Globo-სა და Fox Sports-ის ბრაზილიელი ჟურნალისტი რობერტა სეტიმი (Roberta Setimi). გატაცებულია სერფინგით, ტანვარჯიშითა და იოგათი.

ედუარდა პეჩინატიც (Eduarda Peccinatti) ბრაზილიელია. Fox Sports Brasil-ის სპორტული გადაცემების წამყვანი და საფეხბურთო მიმომხილველია (თავისი ფოტო-ალბომები ჩაკეტილი აქვს, ამიტომ მხოლოდ ოფიციალური მედია-ფოტოების ამარა ვართ ).

არგენტინელმა პამელა დავიდმა (Pamela David) 38 წლის განმავლობაში უკვე ბევრი რამ მოასწრო: იყო “ფლეიბოის” მოდელი, მონაწილეობა მიიღო სილამაზის კონკურსებში, რეალითი შოუებში, სცადა მსახიობობა, გაახმოვანა რამდენიმე ფილმი, სიმღერებიც ჩაწერა და BBC-ის Match of the Day-ის წამყვანიც იყო.

37 წლის არგენტინელი ჟურნალისტი და მოდელი ალინა მოინი (Alina Moine) არგენტინულ Fox Sports-ზე მუშაობს. სპორტულ ამბებს მიმოიხილავს და სპორტული თოქ-შოუს წამყვანია. უსმენს ჰევი მეტალსა და ჰარდ როკს. სირბილის დიდი პროპაგანდისტია, მარათონელი. მეკლდეურია და დართსიც უყვარს. ერთ-ერთი ყველაზე პოპულარული არგენტინელი სპორტული ჟურნალისტია, გამორჩეულად პოპულარულია ვიდეო, სადაც გადაცემის წაყვანისას პირდაპირი ეთერის დროს მერილინ მონროს ცნობილი კაბის ფრიალის სცენა გაიმეორა უნებლიედ.

ოკეანგადაღმა ამერიკული ფეხბურთი, ჰოკეი, კალათბურთი, ბეისბოლი უფრო უყვართ და ყველა ლამაზ ჟურნალისტსაც მაქეთკენ მიუწევს გული. ასე იყო კანადელი ჯული სთიუართ-ბინქსიც (Julie Stewart-Binks), Toronto Maple Leafs-ის დიდი გულშემატკივარი და CBC-ის კორესპონდენტი NHL-ის მატჩებზე, მაგრამ ESPN-სა და Fox Sports West-ზე გადასვლის შემდეგ, MLS-ს მიმოიხილავს და მსოფლიო ჩემპიონატებზეც მუშაობს. 29 წლისაა.

MLS-ის მატჩებს მიმოიხილავს ამერიკელი ჩარისა თომსონიც (Charissa Thompson). ჩვენებური ფეხბურთი (იქ სოკერად წოდებული) მისთვის დამატებითი სამუშაოა. იყო NHL on Versus და The NFL on Fox Sports-ის წამყვანი, მაგრამ ESPN-ზე MLS-საც უთმობს ყურადღებას. 34 წლისაა და ერთ-ერთი ყველაზე პოპულარული სპორტული ჟურნალისტია.

უგულშემატკივრეთ ფეხბურთს და გახსოვდეთ – კარგი წამყვანის ხელში ყველაზე მოსაწყენი მატჩიც კი შეიძლება ნამდვილ სანახაობად იქცეს!

© Lord Vader. Stylish Blog. საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით. This work is licensed under a Creative Commons Attribution-NonCommercial 4.0 Unported License.

___

P.S.

ევროპელ სპორტულ ჟურნალისტებზე – მეორე ნაწილი.

P.P.S.

გასულ კვირას და ბოლო დროს ისეთი პოსტები მქონდა, რომ ეს ორშაბათი, დროა, გავალაითო.