How-to: ვლაგდებით სამოგზაუროდ

მოგზაურის რვეული:
ჩანთა, რომელიც უნდა ჩაალაგო, ქანცი რომ არ გაგწყდეს

გრილი ღამე (თბილისიდან რეისები ხომ, ჩვეულებრივ, გამთენიისასაა), თბილისის აეროპორტი (ან, თუნდაც – ქუთაისისა იყოს), მშვენიერი, სამოგზაურო განწყობა და თქვენი მეუღლე/პარტნიორი/მეგობარი/თანამგზავრი (საჭირო – დატოვეთ), რომელიც ორი უზარმაზარი (ან – სამი საშუალო, ან ერთი პატარა და ორი უზარმაზარი, ზურგსუკან რომ მალავს) ზომის ჩემოდნით მობრძანდება. Sad smile

ნაცნობი ამბავია?

ახლა ვნახოთ, როგორ ჩავბარგდეთ ისე, რომ ყველაფერი აუცილებელი თან გვქონდეს და ერთ სულზე ერთი საშუალო ზომის (თვითმფრინავის სალონში რომ აგვატანინებენ – ისეთი) ჩანთა გვეყოს.

წესი პირველი (დაუჯერებელი): ჩანთა მეტად (ან, როგორც მინიმუმ, არანაკლებ) ბევრს იტევს, ვიდრე – ჩემოდანი, თუ სწორად ჩაალაგებ.

(აქ ვგულისხმობ: ზურგჩანთას, ან მესინჯერს ან ყველა სხვა ტიპის ჩანთას, რომელსაც ზურგზე მოიგდებ, მხარზე გადაიკიდებ ან გააგორებ, მთავარია – იყოს მჩატე, ელასტიური, კარგად შეკერილი, სასურველია – ვერტიკალური (თუ გორგოლაჭები აქვს – ბრუნვადიც) და არა-ჰორიზონტალური).

წესი მეორე: ყველაფერი, რაც საშუალოსტატისტიკურ, არაპარანოიდალურ, არაპიემესიან ადამიანს სჭირდება 7-10-დღიანი მოგზაურობისთვის ჩაეტევა 25-40 ლიტრი მოცულობის ჩანთაში.

(მიახლოებით ის ზომაა, ავიაკომპანიის ხელბარგისთვის დაშვებულ ლიმიტს რომ არ ცდება).

წესი მესამე: თუკი ტანსაცმლის დიდ ნაწილს არ დაკეცავთ, არამედ – დაახვევთ, გაცილებით ბევრს ჩაატევთ ჩანთაში. იმდენს, რომ თავადაც გაგიკვირდებათ. აი, მაგალითად – ამდენს:

Pack like a pro by Heather Poole

აქვე – ინსტრუქცია ფოტოებით. Smile

ახლა, სანამ იმას გაიფიქრებთ: რომ ვეტყვი, ეგ შენი საყვარელი დოლჩეგაბანა კაბა არ დაკეცო – მე დაგიხვევო, ხომ მიპასუხებს დაახვევ და…. ისა, როგორც ამბობენ ხოლმე დახვეულზე… აი, სანამ ამას გაიფიქრებთ, იხილეთ

თეორემა მეოთხე (ძნელად დასაჯერებელი, მაგრამ მეცნიერულად და ცდითა და გამოცდილებით დამტკიცებული): ეს, ავენტინური ტრიადის ცრუ ღმერთების სწავლებით დახვეული ტანსაცმელი, ბევრად ნაკლებად იკუჭება, ვიდრე ისე, მამა-პაპურად, ქართული ტრადიციების დაცვით ჩაჩემოდნებული.

წესი მეხუთე: რაც დახვევას არ ექვემდებარება – უნდა ერთმანეთზე დადოთ და ისე დაკეცოთ წყვილ-წყვილად და სამ-სამადაც. განუზომლად მეტი ჩაეტევა.

PacklightPack-light

წესი მეექვსე (დამხმარე): მეტი კომპაქტურობისთვის, დაკეცილი ტანსაცმლის ვაკუუმ-პაკეტში მოთავსებაც შეიძლება. ამბობენ – 20-25 სანტიმეტრს კიდევ მოიგებო ჯამში. არ მიცდია/არ დამჭირვებია.

რჩევა მეშვიდე: სასურველია, ხელჩანთის ზიპერები (ელვა-შესაკრავი) სამგზავრო კლიტით იკეტებოდეს – ვინცობაა, სალონში ვერ აიტანოთ (მაგალითად – ისეთი რამ გედოთ შიგ, რისი ატანაც ავია-სალონში აკრძალულია) და ჩაბარება მოგიწიოთ.

რჩევა მერვე (დამხმარე): თუ ჩასაბარებელ ჩანთას ქურდბაცაცებისგან დამცავ ბადეს შემოავლებთ, მგზავრების ბარგში ხელების მოფათურე და რამე-რუმეების ამომცინცვლელი მტვირთავებისგან უკეთ დაიცავთ.

ერთიც – ჩასანიშნი:

ამერიკული ავიაკომპანიების მიერ დადგენილი ხელბარგის ზომა არის: სანტიმეტრებში 23x36x56 = ინჩებში 9x14x22.

ევროპული ავიაკომპანიების მიერ დადგენილი ხელბარგის ზომა არის: სანტიმეტრებში 25x45x56.

NB! ლოუქოსთერებს, შეიძლება, სხვა სტანდარტები ჰქონდეთ!

Creative Commons License © Lord Vader. Stylish Blog. საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით. This work is licensed under a Creative Commons Attribution-NonCommercial 4.0 Unported License.

___

Pack like a pro by Heather Poole

A Step-By-Step Guide To Japanese Tidying Guru’s Space-Saving Folding Method

და ესეც იყოს ბარემ. :))

https://www.youtube.com/watch?v=9JvmAktLvFg

********

P.S.
1. კომენტარები იმიტომ არის გათიშული, რომ ბარგის ჩალაგების წესი, გზა და მეთოდი ყველას თავისი აქვს და ჩანთის ზომა-წონაზე წარმოდგენაც…. და მეზარება კომენტარების კომენტირება. 🙂 ფერშტეინ?

2. პოსტშიც დავწერე, რომ ავია-სალონში ასატანად დაშვებული ხელბარგის ზომა დადგენილი სტანდარტია არა-ბიუჯეტური ავიაკომპანიებისთვის. ლოუქოსთერებმა შეიძლება დამატებითი შეზღუდვები დააწესონ.

3. კონკრეტული ფირმების რჩევა ძნელია. აქსიომაა, რომ Samsonite არის ჰაი-კლასი და ჰაი-ფასი. 🙂 რაღაც ჩინური ნონეიმი არის იაფი და (ალბათ) გამოდგომაზეა.
თუ მაინცდამაინც, რაც გამოცდილია და არც უსაშველოდ ძვირი (ყველაფერი ფარდობითია, ცხადია) Hynes Eagle-ს კარგი რივიუები აქვს და მაქსიმალური მოცულობა ხელბარგის ზომის სტანდარტის დაცვით. კიდევ აქებენ eBags-ს.
მე Cabin Max-ის ზურგჩანთა მაქვს რამდენიმე წელია უკვე და კმაყოფილი ვარ. მჩატეა და ძალიან მოცულობითი. კიდევ New Outlander ვიყიდე. იმიტომ რომ ძალიან დაბალი ფასი ჰქონდა და ძალიან მაღალი შეფასება. თან Cabin Max-ზე უფრო კომპაქტური, მჩატე და იოლად დაკეცვადი ჩანთა მჭირდებოდა და გაამართლა.

4. კიდევ მკითხეს რაღაც, იმაზე ცალკე პოსტს დავწერ მოგვიანებით. 🙂
მადლობა.

Advertisements