ჯოკონდა – ინტერაქტივი

ვისაც ლუვრში ყოფნის ბედნიერება ჰქონია, პირველი, რის სანახვად გავარდით, უთუოდ, ლეონარდო და ვინჩის “მონა ლიზაა”. არ ვიცი, რა შთაბეჭდილება დაგრჩათ… როგორც რანევსკაიას უთქვამს: ამ ქალმა უკვე იმდენ ადამიანზე მოახდინა შთაბეჭდილება, რომ ახლა თავად წყვეტს, ვიზე მოახდენს შთაბეჭდილებას და ვიზე არაო. 🙂 სიმართლეა.

იმ ადამიანებს შორის, ვიზეც “მონა ლიზამ” შთაბეჭდილება მოახდინა, ზოგი ისე “შეაქანა” რომ ტილოს განადგურებაც სცადა. ამიტომაა, რომ ვერ მიუახლოვდები დღეს და საგანგებო ტყვიაგაუმტარი შუშა იცავს. მაგიერ იმ “მონა ლიზა”-ს რომელსაც მთელს მსოფლიოში დაატარებს Grande Exhibitions მიუახლოვდები კიდეც, ხელითაც შეეხები და ფეხიც შეგიძლია დააბიჯო. ან, სულაც, ზედ წამოწვე.

Grande Exhibitions ავსტრალიური კომპანიაა, რომელიც მულტიმედიურ, ინტერაქტიულ და 3D გამოფენებს მართავს მთელს მსოფლიოში. სადაც მიიწვევენ. ასეთი მიმწვევები კი ბევრი აქვთ: პარიზიდან, რომიდან, მადრიდიდან დაწყებული და ნიუ იორქი, მონრეალი, ტოკიო, სეული, სტამბოლი, ქეიფ თაუნი, თელ ავივი, რიო, ბუენოს აირესი, და ყოფილი სსრკ-ს უამრავი ქალაქი – ალმა-ატა გინდა, ოდესა, ყაზანი, თუ სხვა. თბილისში ჯერ არ იწვევენ.

პირველი მულტიმედიური გამოფენა რომელიც კომპანიამ მოაწყო, ლეონარდო და ვინჩის შემოქმედებას ეძღვნებოდა – 2005 წელს.

ოღონდ არ მითხრათ ახლა – ორიგინალში ჯობს ნახვაო.

დღეს უკვე 120-ზე მეტი “ცოცხალი” გამოფენა აქვთ და არამხოლოდ მხატვრობის თემაზე: ტექნოლოგია, კოსმოსი, პლანეტა დედამიწა, ფლორა და ფაუნა, წიგნები, პოლიტიკა… ასე რომ სათავისოს ყველა ნახავს.

© Lord Vader. Stylish Blog. საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით. This work is licensed under a Creative Commons Attribution-NonCommercial 4.0 Unported License.

___

http://www.grandeexhibitions.com