დომენიკო კროლა (Domenico Crolla) გლაზგოს იტალიური რესტორნის, Bella Napoli-ს მფლობელი და შეფ-მზარეულია. როგორი კულინარია, ვერ გეტყვით, გლაზგოში აბა ნამყოფი არ ვარ და მის ნახელავს სად დავაგემოვნებდი, მაგრამ კრეატიული ადამიანი კი ჩანს – სხვა იტალიური რესტორნებისგან გამოსარჩევად პორტრეტებიანი პიცის გამოცხობა მოიფიქრა, აი – ასეთების:
22 წლის იყო, როდესაც პირველი პიცერია გახსნა, იქამდე მამამისის რესტორანში მუშაობდა. ახლა უკვე 220-ადგილიან რესტორანს მართავს. მისი კერძები არ გამისინჯავს-მეთქი, მაგრამ წარმატება მარტო ორიგინალური პიცების გამო ვერ ექნება – უთუოდ, კარგი შეფია და კარგი მენეჯერი. ხატვით კი პიცებზე უკვე 10 წელია ხატავს. თავიდან ხუმრობა იყო, გართობა, დღეს – მისი რესტორნის საფირმო ნიშანია. მიმდევრებიც გამოუჩნდა… ისეთებიც არიან, ვინც იდეას ედავება და პირველობასაც ჩემულობს. მე ქორონიკონად ვერ გამოვდგები. თავად დომენიკო ამბობს, რომ პიცაზე ხატვის სურვილი მას შემდეგ აღეძრა, რაც ერთი კორეელი შეფის მიერ ბოსტნეულიდან გამოქანდაკებული სკულპტურები იხილა.
ცხადია, კროლას “მხატვრობაში” იტალიელების პორტრეტები სჭარბობს. ასეც უნდა იყოს, რაც არ უნდა თქვა, პიცაა მაინც და შეფიც იტალიელია. ასეთი “საგამოფენო პიცის” გემოსი რა გითხრათ და პორტრეტული მსგავსება კი დიდია. თუმცა, დომენიკო კროლა ჩივის, ჯორჯო არმანის გამოპიცება არ გამომდის – ძნელი მისამგვანებელიაო… მაგრამ ამოცნობა არ გაგიჭირდებათ. დავწერ მაინც: სინატრა და უორჰოლი. მერილინი და სოფია. დედოფალი ბი და დედოფალი ლიზა. კიდევ ერთი დედოფალი – ბურლესკისა დითა ფონ თისი და რიანა. ვერდი და პაპი ფრანცისკე. ჯოკონდა და ლაგერფელდი. ფორდი და არმანი. “ვერსაჩე” და “ფლეიბოის” დამფუძნებელი ჰიუ ჰეფნერი. ანდრეა პირლო და კრიშტიანუ რონალდუ. აწ უკვე ბექჰემადქცეული ფოშ სფაისი მეუღლითურთ. ალ პაჩინო და ქლინთ ისთვუდი/”კარგი”, ლი ვან ქლიფი/”ცუდი”, ელი უოლაჰი/”ბოროტი”. ბრიტანული და ამერიკული “ვოუგის” რედაქტორები ანა უინთერი და ჰემიშ ბოულზი. ლაბუტანები და თავად კროლა მადონათი ხელში.
© Lord Vader. Stylish Blog. საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით. This work is licensed under a Creative Commons Attribution-NonCommercial 4.0 Unported License.
___
Domenico Crolla: the ART of Making Pizza
Stylish Blog 