ძაღლი, ნიანგი, ლევ ტოლსტოი და მათი მეგობრები

აქა ამბავი თეთრი ბიგლის და მწვანე ნიანგის დაძმობილებისა.

იცით თუ არა, ვინ არის სნუფი? ბიგლის ჯიშის ძაღლია. ამერიკელი კარტუნისტის, ჩარლზ შულცის (Charles M. Schulz) პოპულარული კომიქსის Peanuts-ის გმირი. მართალია, 1950 წელს დაიბადა და პატარა აღარ ეთქმის, მაგრამ მაინც ლეკვია. და როგორც ყველა ლეკვს შეეფერება – ძალიან ანცი და მხიარული. 2010-ში 60 წლის იუბილეც დიდი ზარ-ზეიმით აღნიშნა. დღესასწაულის ანიმატორობა იაპონელმა დიზაინერმა, ჰაიატო კოჰამამ (Hayato Kohama) ითავა, რომელმაც 15 სხვადასხვა კომპანიას სთხოვა კარგი რამე-რუმეების შექმნა სნუფისა და მისი მეგობრების თემაზე. მათ შორის იყო Lacoste-იც.

უნდა ითქვას, რომ სნუფი გვარიანი ჭინჭის კაცია… კიარადა ჭინჭის ძაღლი. 1984 წელს, Peanuts-ის 35 წლის იუბილის აღსანიშნავად მისთვისა და მისი დის, ბელისთვის ტანსაცმლის კოლექციები შექმნეს: Gianni Versace-მ, Gucci-მ, Oscar de la Renta-მ, L.L. Bean-მა, Missoni-მ, Fendi-მ და Paco Rabanne-მა.

წელს კომიქსის გმირებს 65 წელი შეუსრულდათ. სნუფისა და ბელის სამოსზე ამჯერად იზრუნეს მოდის სახლებმა: Calvin Klein, DKNY, Kenneth Cole, Anna Sui, DVF, Isabel Marant, Emanuel Ungaro, Dsquared2, Isaac Mizrahi, Swarovski… ცხადია, ვერც ძველი მეგობარი, “ლაკოსტი” დარჩებოდა განზე.

კოლექცია Peanuts x Lacoste 2015 ძალიან მხიარული გამოვიდა.

კომიქსი ჩვენთან ახალი ხილია და არც პოპულარულია დიდად. ამერიკასა და მსოფლიოს ბევრ ქვეყანაში კი დიდი საქმეა. Peanuts კლასიკური, ოდნავ ნოსტალგიური საბავშვო კომიქსია – მაგნეტოების, ვოლვერმენების, ბეტმენებისა და ავტობოტების გარეშე. ახლახან სნუფის ვარსკვლავმა ჰოლივუდის დიდების ბულვარი დაამშვენა, მიქი მაუსისა და ბაგზ ბანის ვარსკვლავების მახლობლად, მისი შემქმნელის, ჩარლზ შულცის ვარსკვლავის გვერდით. სნუფის გასართობი პარკიც აქვს, დისნეილენდის მაგვარი. თან – არაერთი. და – არამხოლოდ ამერიკაში. ის ამერიკის კოსმოსური პროგრამის, აპოლოს თილისმა და ყველა ასტრონავტისა და კოსმონავტის საუკეთესო მეგობარია… ახლა, კაცმა რომ თქვას, კომიქსის მთავარი გმირი ვითომ არა სნუფი, არამედ მისი პატრონი – ჩარლი ბრაუნია…

მაგრამ ბავშვებს სნუფი უფრო უყვართ.

დიდებსაც.

დიზაინერებსაც.

და ნიანგიც სნუფისთან ერთად აშკარად უფრო კარგად გაერთო.

თავად სნუფის კი ლევ ტოლსტოის “ომი და მშვიდობა” უყვარს. აგერ უკვე 65 წელია კითხულობს – დღეში თითო სიტყვას. არ ვიცი, რომელ თავზეა მისული, მაგრამ ჩემზე მეტი კი ექნება უკვე წაკითხული.  

© Lord Vader. Stylish Blog. საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით. This work is licensed under a Creative Commons Attribution-NonCommercial 4.0 Unported License.

___

Peanuts x Lacoste 2015 წლის შემოდგომის კოლექცია.

კომიქსები Peanuts: სნუფი და მისი მეგობრები.

ფილმი: The Peanuts Movie (ქართულად)