ქალი იცის მან…

…ქუხნაში! და სუნამოს ახალ სერიას წარმოგვიდგენს.

ქართველ მამაკაცებს მოეწონებათ. ეჭვი მაქვს, საშობაო-სასაჩუქრე ჰიტიც გახდება.

სარეკლამო კამპანიის სახე ლინდა ევანჯელისთაა, ფოტოგრაფი – სთივენ მაიზელი, იდეის ავტორი კი – ჯერემი სქოთი (Jeremy Scott), Moschino-ს შემოქმედებითი დირექტორი.

მისი საყვარელი რეჟისორი უოლთ დიზნია, საყვარელი ფერი – ცისარტყელა, საყვარელ რესტორნად მაქდონალდსს ასახელებს, საყვარელ კერძად კი – შემწვარ კარტოფილსა (ფრენჩ ფრაისს) და პიცას. ამ სუნამოთი აგრძელებს უჩვეულო ფლაკონებში მოთავსებული სუნამოების სერიას, რომელიც სათამაშო დათუნია Toy-თი დაიწყო. იტალიური მოდის სახლის ამჟამინდელი კრეატიული დირექტორი მზადაა ყველაფერი, რაც მის თვალსაწიერში მოხვდება, ფეშენ-აქსესუარად აქციოს. ის გატაცებულია პოპ-არტით და თანამედროვე მოდის ენდი უორჰოლია. არ გამიკვირდება, თუ მომავალში ჩვენ ვიხილავთ სუნამოს ლუდის ბოთლებში, კეტჩუპის პაკეტებში, კონსერვის ქილებში  და ვინიცის კიდევ – სად. თუნდაც – ტუალეტის ქაღალდში. მას ეს შეუძლია!

ამის მსგავსია ჯერემი სქოთის ტანსაცმლის კოლექციები, სადაც უამრავი ფერი და უჩვეულო პრინტებია. სადაც დოლჩესა და გაბანას ინსპირაცია ძველი რომი და ბიზანტიური ფრესკებია, ჯერემი სქოთი ანიმაციური პერსონაჟებითაა შთაგონებული. ბოლო კოლექცია კი, სულაც, თოჯინა ბარბის მიუძღვნა –  ამერიკელია მაინც და ვერც იტალიურად საუბრობს, მაგრამ საუბრობს “მოსკინოურად”. და ძალიან კარგად მოერგო ამ ბრენდს.

Moschino ახალგაზრდა მოდის სახლია. ფრანკო მოსკინომ (Franco Moschino) დააფუძნა 1983 წელს. ინოვაცია, თამამი გადაწყვეტები, ფერთა აფეთქება და იუმორი იტალიელი დიზაინერის საფირმო ნიშანი იყო. მას ჟან-პოლ გოტიეს ადარებდნენ, ფრანგული და მსოფლიო მოდის Enfant terrible-ს. ფრანკო მოსკინო 44 წლისა გარდაიცვალა. სახლს სათავეში მისი მოწაფე და პარტნიორი, როზელა ჯარდინი ჩაუდგა, ორი წლის წინ კი ასპარეზი ჯერემი სქოთს დაუთმო. გალტიე, რომელიც კარგად იცნობდა მოსკინოს და ამ ორს, მეგობრობასთან ერთად, იდეათა თანხვედრა და ნოვატორობა აერთიანებდა, აღფრთოვანებას ვერ მალავს ჯერემი სქოთის ნამუშევრებით. ესაა სწორედ, რასაც ფრანკო ისურვებდა – ამბობს გოტიე.

“მოსკინო” ყოველთვის იყო პოპ-ვარსკვლავების რჩეული. განსაკუთრებით იმ ვარსკვლავების, ვინც სიახლეს, სითამამეს, ზოგჯერ – ეპატაჟს ეძებს. სახლი თანამშრომლობდა მადონასთან, დღეს კი კლიენტებს შორის არიან ლედი გაგა და მაილი საირუსი.

ტრადიცია – გრძელდება.

© Lord Vader. Stylish Blog. საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით. This work is licensed under a Creative Commons Attribution-NonCommercial 4.0 Unported License.

___