ჩამოლაბორანტებული კოსტიუმი

როგორ ჩამოვალაბორანტოთ კოსტიუმი – ამ თემაზე დაწერილი პოსტი ერთ-ერთი პირველი იყო ბლოგზე. შორეულ 2009 წელს. 🙂 ახლახან DMarge Magazine-ის რედაქტორის სვეტში მსგავს სტატიას გადავაწყდი და ბარემ იმ პოსტის ერთგვარ გაგრძელებას დავწერ. ცოტა ძველს გავიხსენებ და ცოტა ახალსაც დავუმატებ DMarge-იდან.

კოსტიუმი, ტრადიციულად, ფორმალურ ტანსაცმლად მიიჩნევა. ბევრი ოფისშიც აღარ იცვამს, თუკი რამე ძალიან ოფიციალური შეხვედრა არ აქვს დაგეგმილი და პიჯაკს ანიჭებს უპირატესობას. ფიქრობს, რომ კოსტიუმი ისეთი რამაა, ამგვარი იშვიათი შეხვედრების თუ საღამოს მიღებების დროს რომ ჩაიცვამ მხოლოდ. კიდევ ქორწილში და გასვენებაში. სხვა დროს გარდერობშია მოწყენილად. რა დაგიმალოთ და მეც ასე ვფიქრობდი.

მაგრამ 21-ე საუკუნემ ბევრი სიახლე მოიტანა. ფორმალური ჩაცმის სტილის გახალისება (როგორც იმ ძველ პოსტში დავწერე – ჩამოლაბორანტება), შეიძლება ისე, რომ კოსტიუმზე უარი არ ვთქვათ.

პირველი, ყველაზე იოლი და პოპულარული გზა კოსტიუმისა და ნაქსოვი სამოსის (სვიტერი, კარდიგანი) შეხამებაა.

ჰალსტუხის ჩანაცვლება ფერადი შარფით – კიდევ ერთი პოპულარული მეთოდია.

ფორმალური კოსტიუმი და არაფორმალური (casual) პერანგი – ჯინსის, ფერადი, კუბოკრული, პრინტებით…

მიუხედავად იმისა, რას ამბობდნენ 20-ოდ წლის წინ, 21-ე საუკუნეში კოსტიუმი ჰგუობს პოლოსა და T-shirt-ს.

კიდევ ერთი, ძველთაძველი, საუკუნის წინ დამკვიდრებული წესია, რომ კოსტიუმი ითხოვს ჰალსტუხს და ქამარს. დღეს (ზემოთაც ვნახეთ) – უჰალსტუხოდ შეიძლება და შეიძლება უქამროდაც, თუმცა უქამრობას სჯობს, იმჰო, გამოიყენოთ ისეთი ქამარი, რომელიც გაახალისებს კოსტიუმს.

ყველაზე შეუვალი კანონი, ალბათ, ის იყო, რომ ბათინკი მეტისმეტად casual-ია და კოსტიუმთან იცვამდნენ ფორმალური სტილის ფეხსაცმელს… მაგრამ დღეს ეს წესიც დაინგრა კართაგენივით.

ჩემი ლურჯი ფერის “ქლარქსის” desert boot მშვენივრად უხდება ჩემს კოსტიუმს.

და თუ ბათინკი მოსული პონტია, სპორტულმა ფეხსაცმელმა (კედები, ბოტასები, boat shoes…) რაღა დააშავა?

დაბოლოს, წლიდან-წლამდე სხვადასხვა ჟურნალის მიერ ჩატარებულ გამოკითხვაზე – რა სურთ ქალებს, რომ ეცვას მამაკაცს, ქალების პასუხი უცვლელია: კოსტიუმი (ის პოპულარობით ჯინსის შარვალსაც კი უსწრებს) და მათი უმრავლესობა მიიჩნევს, რომ კოსტიუმს როცა ეხება საქმე, დეივიდ ბექჰემია სტილის დამდგენი.

ქალები მეტისმეტად კონსერვატორები არიან – დავუნგრიოთ მათ სტერეოტიპები!

© Lord Vader. Stylish Blog. საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით. This work is licensed under a Creative Commons Attribution-NonCommercial 3.0 Unported License.

___