რაც ყველაზე ძალიან გიყვარს…

შაბათის პოსტი

1140 წელს გერმანიის მეფის, კონრად მესამის ჯარმა, რომელიც ჩაბმული იყო ომში შვაბიის მმართველ, ტოსკანის მარკგრაფ ველფ მეექსვესთან, ალყა შემოარტყა ქალაქ ვეინსბერგს. ქალაქის დამცველები უდრეკნი აღმოჩნდნენ და მომხვდურთ გააფთრებული წინააღმდეგობა გაუწიეს. წელიწადნახევრის განმავლობაში ცდილობდა კონრადი ქალაქის აღებას, ბოლოს, როცა მეციხოვნენი გაწყდნენ, ქალაქის მცხოვრებთ სურსათ-სანოვაგე შემოაკლდათ და ისრებიც დაელიათ, რომ მტრისთვის დაეშინათ, მოახლოებული გამარჯვების ოხშივრით დამთვრალმა კონრადმა დაიფიცა, ქალაქს მიწასთან გავასწორებ, ზედ გუთანს გადავატარებ, ქალაქის მაცხოვრებელთ კი ყველას ერთიანად გავწყვეტო… რომ შეჰკადრეს – ასეთი დაუნდობლობა მეფეს არ შვენისო, კონრად მესამე მოლბა და პირობა დადო – ქალებს ხელს არ ვახლებ, ნებას ვრთავ, ქალაქი დასტოვონ და რაც რამ ყველაზე ძვირფასი ავლა-დედება აქვთ, ზურგზე მოიკიდონ და ხელს გააყოლონო.

როდესაც ვეინსბერგის გალავნის კარიბჭე გაიღო, მოალყეებმა დაინახეს ვეინსბერგელი ქალები, რომლებიც მშობლიურ ქალაქს ტოვებდნენ და ზურგზე კი ქმრები ჰყავდათ მოკიდებული. კონრადი შეცბა, მაგრამ მიცემული სიტყვა არ გატეხა და გზა მისცა. ვეინსბერგის გალავანს კი სახელად “ქალთა ერთგულება” შემორჩა.

“ვეინსბერგელ ქალთა აღლუმი” დღესაც იმართება ამ ქალაქში და ერთ-ერთი ყველაზე სახალისო სანახაობაა. მართალი იყო ჰეგელი, როცა ამბობდა: ისტორია ორჯერ მეორდება – პირველად, როგორც ტრაგედია და ხელმეორედ – როგორც ფარსიო. 🙂

© Lord Vader. Stylish Blog.
საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით და მხოლოდ არაკომერციული მიზნებით. This work is licensed under a Creative Commons Attribution-NonCommercial 3.0 Unported License.

___

ისეკი, საინტერესოა, კონრადს ქალაქის დატოვების ნება მამაკაცებისთვის  რომ დაერთო, ვის გამოიყვანდნენ ისინი ზურგით? 😉

ავტორი: Lord Vader

Not stupid, or inconsiderate. Not obnoxious, or violent, or boring, or annoying. Not a bad dresser, not unemployed, and not unhandsome, either. Still drive people mad sometimes. :) View all posts by Lord Vader