გამარჯობა, შენ ხარ სნობი!

ამიტომ, არ გაგიჭირდება ამ სნობური ლოგოების ამოცნობაც. 🙂

მინიშნება (რომელიც არ გჭირდება):

ყველა ეს ბრენდი მოდის ინდუსტრიაშია და თავის სეგმენტში ერთ-ერთი კანონმდებელიცაა.

ყველა ამ ბრენდმა დროს გაუძლო.

ყველა ეს ბრენდი იყიდება ლილოს ბაზრობაზე. 🙂

რამდენიმე ლოგოს მცირე “დაფოტოშოფება” (ჩემს შემთხვევაში – დაქორელება) დასჭირდა, რომ წარწერა მომეშორებინა – ის შენიშნვა გავითვალისწინე, რაც წინა ლოგოობანას (ბრენდები და ლოგოები) დროს გამოთქვეს.

***

***

პასუხები:

1. Louis Vuitton Malletier ან უბრალოდ Louis Vuitton – ფრანგული სუპერ-ლაქშარი მოდის სახლი, რომელიც უკვე 150 წელიწადზე მეტია, რაც არსებობს, ყველაფერი კი იმით დაიწყო, რომ ლუი ვუიტოს პარიზში გასამგზავრებლად მოსახერხებელი ჩემოდანი არ აღმოაჩნდა და თავად შექმნა ის. მოგვიანებით ისე გაითქვა სახელი, რომ ნაპოლეონ მესამის მეუღლისთვისაც კი ამზადებდა ჩანთებსა და ჩემოდნებს. ამჟამად კომპანიის შემოქმედებითი დირექტორი თვით მარქ ჯაქობსია. ხელჩანთები, ქეისები, სათვალეები, ფეხსაცმელი, საათები – გამოაღეთ თქვენი გარდერობი, ის იქ არის და თუ არ არის – იქნება! რა თქმა უნდა, ჩემი ბლოგის ყველაზე სნობ მკითხველს ამ ლოგოს ამოცნობა არ გაუჭირდებოდა.

2. Givenchy – 1952 წელს დააფუძნა დიზაინერმა იუბერ დე ჟივანშიმ. ტანსაცმელი, აქსესუარები, პარფიუმერია… ამბობენ, რომ ქალისთვის ერთ-ერთი ყველაზე ელეგანტური, მოხდენილი და ჰაეროვანი სამოსის მწარმოებელი სწორედ ჟივანშია, ტყუილად როდი იყვნენ მის კლიენტთა შორის ოდრი ჰეფბერნი და ჯაქლინ ქენედი. მეტრი ცოცხალია, მაგრამ ტანსაცმლის კოლექციებზე აღარ მუშაობს. “ჟივანშის სახლის” შემოქმედებითი დირექტორი დღეს იტალიელი დიზაინერი რიკარდო ტიშია.

3. Ted Lapidus – ამ მართლაცდა გამორჩეულ ფრანგ დიზაინერზე ადრე დავწერე ბლოგზე, აღარ გავიმეორებ. მისი მაღაზია თბილისში იყო, შემდეგ – დაიკეტა, ახლა კი კვლავ გაიხსნა პეკინზე. ელეგანტური და არც ისე ძვირი.

4. Valentino – იტალიელი ვალენტინო გარავანის მიერ 1959 წელს დაარსებული მოდის სახლი. ვალენტინო ყველამ იცის, სხვა რა უნდა ვთქვა? ის ერთადერთია ძველი გვარდიიდან, ვინც ჯერ ისევ ფრონტის წინა ხაზზეა. მას “უკანასკნელ იმპერატორს” უწოდებენ. მისი კალიბრის ყველა დანარჩენი უკვე საიქიოსაა და ვალენტინოს, იუბერ დე ჟივანშისა და პიერ კარდენსღა ელიან. “ვალენტინოს სახლის” დიზაინერები იტალიური ტანდემია – მარია გრაცია ჩიური და პიერ პაოლო პიჩოლი.

5. Yves Saint Laurent – 1962 წელს გენიალური ფრანგი დიზაინერის ივ სენ ლორანისა და მეწარმე პიერ ბერჟეს მიერ დაფუძნებული მოდის სახლი. გარდაცვალებამდე ცოტა ხნით ადრე, 2002 წელს ივ სენ ლორანმა სახლი დახურა, თუმცა ამ ბრენდის ქვეშ “გუჩის ჯგუფი” კვლავ აწარმოებს ტანსაცმელს, აქსესუარებსა და პარფიუმს. ბრენდის დიზაინერი ამჯამად იტალიელი სტეფანო პილატია.

6. Polo Ralph Lauren – ალბათ მსოფლიოში ყველაზე პოპულარული და კარგად ცნობილი ამერიკელი დიზაინერის რალფ ლორენის მოდის სახლი 1967 წლიდან აწარმოებს სპორტულ, ყოველდღიურ და გამოსასვლელ ტანსაცმელს. აქვს პარფიუმერული ხაზი, ტყავეული, საათები, ასე განსაჯეთ, ზეწრები და პირსახოცებიც კი… რალფ ლორენი ბიზნესის ღმერთია. საუკეთესო ყნოსვა აქვს და ყოვეთვის იცის, თუ რა იქნება მოდაში.

7. ეს ვეშაპი ამერიკული ყოველდღიური და სპორტული ტანსაცმლის ბრენდის Vineyard Vines-ის ლოგოა. ამ ბრენდზეც დავწერე ადრე.

8. Burberry – ეს მარადიული ფასეულობაა – ასე ამბობენ ინგლისში. ბრენდი 1856 წლიდან არსებობს და მისი დამფუძნებელი მეწარმე თომას ბერბერი იყო. მსოფლიოს 100 უძვირფასეს ბრენდს შორისაა. “ბერბერი” ბრიტანეთის სამეფო ოჯახის წევრებისთვისაც კერავს და საგანგებო სამეფო სტატუსიც აქვს. სახლის შემოქმედებითი დირექტორი ინგლისელი დიზაინერი ქრისთოფერ ბეილია.

9. Lilly Pulitzer – სამეფო გვარის კლიენტურით, შეიძლება, ვერ დაიკვეხნის, სამაგიეროდ ეს ამერიკელი დიზაინერი თავადაა “ფრეფის დედოფალი” და მისი კომპანიის ლოგოც ბევრი წარმატებული, ამბიციური და გემოვნებიანი ადამიანის სამოსს ამშვენებდა და ამშვენებს, რომელთა შორისაც იყვნენ ჯექი ქენედი და მისი ქალიშვილი, როქფელერების, ვანდერბილთებისა და სხვა უოლ სთრითის მეფეების ოჯახის წევრები. ლილიმ თავისი ბიზნესი წვენების წარმოებით დაიწყო, მაგრამ 1960 წლიდან სამოსზე გადაერთო. კომპანიის მთავარი დიზაინერი ჯენი შონბორნია.

10. უბრალოდ Levi’s და სიტყვები საჭირო აღარაა! 🙂

11. ეს საყვარელი მწევარი Trussardi-ს სახლის ლოგოა. კომპანია 1910 წლიდან არსებობს და თავდაპირველად ტყავის ხელთათმანების წარმოებით იყო დაკავებული, მოგვიანებით დამფუძნებლის, დანტე ტრუსარდის შვილიშვილმა, პროფესიით ეკონომისტმა ნიკოლა ტრუსარდიმ აქცია იმად, რაც დღეს არის… მანვე შექმნა “ტრუსარდის სახლის” ეს ლოგოც. ტრუსარდის გვარს რაღაც წყევლა სდევს თან – ნიკოლას მამაც და უფროსი ძმაც ადრე დაეღუპა, თავად ტრაგიკულად გარდაიცვალა ავტოკატასტროფაში და რამდენიმე წლის შემდეგ ამგვარადვე დაიღუპა მისი ვაჟიც. ამჟამად სახლს ნიკოლა ტრუსარდის ქალიშვილები მართავენ, მთავარი დიზაინერი კი მილან ვუკმიროვიჩია.

12. Bill Blass – ორი “B” ერთ-ერთი ყველაზე ტიტულოვანი ამერიკელი დიზაინერის, ბილ ბლასის კომპანიის ლოგოა. ეს ბრენდი 1959 წლიდან არსებობს. მისი სამოსი ცნობილია იმით, რომ არის პრაქტიკული, მოხერხებული და მოხდენილი. ბლასი ამბობდა: “სხვები ქმნიან საუკუნეებისთვის, მე კი – დღევანდელი დღისთვისო”. გამოუსწორებელი მწეველი ბლასი 2002 წელს კიბოთი გარდაიცვალა. ამჟამად მისი ბრენდის ქვეშ მუშაობენ დიზაინერები ფითერ სომი და მაიქლ ბასთიანი, თავად ბრენდი კი კომპანია Peacock International-ს ეკუთვნის – სწორედ იმას, სულ ახლახანს რომ გახსნა თბილისში მაღაზია (სასტუმრო “ჰოლიდეი ინის” – “აჭარის” პირდაპირ).

13. ვერ იცანით? სირცხვილია!!! 🙂 და ახლავე გადით ჩემი ბლოგიდან! 🙂

14. Paco Rabanne – ბასკი დიზაინერის ოჯახმა ესპანეთის სამოქალაქო ომის დროს საფრანგეთს შეაფარა თავი. არ ვიცი, რა გამოვიდოდა პაკოსგან ესპანეთში რომ დარჩენილიყო. შეიძლება “ეტა”-ს ტერორისტი, მაგრამ მან მოდის ინდუსტრიის აფეთქება ამჯობინა და მშვენივრადაც გამოუვიდა. სკანდალისტი, ნოვატორი, ბრჭყვიალა ფერებისა და ზიზილ-პიპილოების მოყვარული პაკო რაბანი განათლებით არქიტექტორია, 1960 წლიდან მოდის ინდუსტრიაშია. მას უნისექსის ერთ-ერთ მამა-მარჩენლადაც მიიჩნევენ. მისი სახლის შემოქმედებითი დირექტორი ინდოელი ავანგარდისტი დიზაინერი მანიშ არორაა.

15. ეს ყველაზე გადარეული და გენიალური ქალის, პანკის დედოფლის, ვივიენ ვესთვუდის მოდის სახლის ლოგოა. ვივიენმა და მისმა მეუღლემ მალქოლმ მაქლარენმა პირველი მაღაზია 1971 წელს გახსნეს. Vivienne Westwood ესაა ბრენდი ყველაზე თამამი და ყველაზე უკიდეგანო ფანტაზიის მქონე ადამიანებისთვის. “თუ შთამბეჭდავ სამოსს ატარებ – უკეთესი ცხოვრება გაქვს,” – ამბობს ვივიენი. მისი სახლის ამჟამინდელი შემოქმედებითი დირექტორი ვივიენ ვესთვუდის ახლანდელი მეუღლე ანდრეას ქრონთეილერია.

16. რაღა თქმა უნდა Converse – სპორტული ფეხსაცმლის მწარმოებელი ეს კომპანია 1908 წელს დააფუძნა ბიზნესმენმა ელიშა ქონვერსმა. სხვათა შორის, ქონვერსი ფრანგი დამპყრობლის, უილიამ (გილიომ) ნორმანდიელის ერთ-ერთი მხედართმთავრის შთამომავალი იყო, ალბათ ამიტომ არც მის კომპანიას გასჭირვებია მსოფლიოს დაპყრობა. კალათბურთის ფეხსაცმელს რაც ეხება – აქ “ქონვერსი” ხომ სულ მთლად მოდის მდგენელია. დღეს კომპანია “ნაიქის” ჯგუფში შედის.

© Lord Vader. Stylish Blog.
საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით და მხოლოდ არაკომერციული მიზნებით. This work is licensed under a Creative Commons Attribution-NonCommercial 3.0 Unported License.

___