მეგობრობა 140 დოლარად

ამბობენ, რომ ერთ სულ მოსახლეზე გადათვლით ქართველები ერთ-ერთი ყველაზე გაფეისბუქებული ერია… მაინცადამაინც არ მჯერა, თუკი ჩვენში ინტერნეტის სუსტ განვითარებას გავითვალისწინეთ და კომპიუტერიც ჯერ კიდევ არ აქვს ბევრს, მაგრამ ასეა თუ ისე, მაინც ბევრნი ვართ.

თავად “ფეისბუქისვე” დათვლით, ერთ საშუალოსტატისტიკურ ფეისბუქელს 130 ფრენდი ყავს. მე პირადად – ამაზე ცოტათი მეტი და ჩემი ფრენდების უმეტესობას კი რამდენჯერმე მეტიც. 🙂 ფრენდების რაოდენობით, ვფიქრობ, ქართველ ფეისბუქელებს მართლაც ბარე ორი ვერ აჯობებს. ჰოდა, გიფიქრიათ თუ არა რა ხეირი მოაქვს ერთ ფეისბუქელ ფრენდს? ეს ციფრი დათვლილია და დაახლოებით 140 დოლარს შეადგენს. ასეთია სოციალური მედიის კვლევისა და მართვის კომპანიის Syncapse-ს მიერ მიღებული შედეგები.

მაგრამ ფრენდი რომ ფულად აქციოთ, ამისთვის რამე ბიზნესი უნდა წამოიწყოთ, ფან-ფეიჯი გახსნათ და რაც შეიძლება მეტი ფრენდი შემოიტყუოთ და გააფანოთ.

თითო ფეისბუქელი ფანი მზადაა არაფანზე ხშირად გაიკრას ჯიბეზე ხელი და თქვენს კომპანიას საშუალოდ 72 დოლარით მეტი დაახარჯოს.

ცხადია, ფანი ფანისგან განსხვავდება. და სხვადასხვა ბრენდის ფანებიც განსხვავებულები არიან. ზოგი უფრო გულუხვია, ზოგიც მეტად წუწურაქი. “ნოკიას” ფეისბუქელი ფანი, მაგალითად 108 დოლარით მეტს ახარჯავს “თავის” ბრენდს, ვიდრე არაფანი. “ნაიქის” შემთხვევაში ეს სხვაობა 121 დოლარია, “კოკა-კოლასთვის” – 70, “მაქდონალდსისთვის” – 160, “ჯილეთისთვის” – 52, “სონი ფლეისთეიშენისთვის” კი – 66.

თუ ადამიანი ფეისბუქში თქვენი ფანი ხდება, დიდი ალბათობით ის რეალშიც დარჩება თქვენდამი ერთგული. ფეისბუქელი ფანი ბევრად უფრო კეთილგანწყობილია და მომავალშიც არ აპირებს თქვენს მიტოვებას არაფანისგან განსხვავებით. საშუალოდ ბრენდის ერთგულ მომხმარებელთა შორის ფანების რაოდენობა არაფანებს 28 პროცენტით აღემატება. იმ ადამიანთა შორის, ვინც “ნოკიას” ტელეფონი კვლავ “ნოკიასვე” ტელეფონით განაახლა კომპანიის ფეისბუქელ ფანთა რაოდენობა 32 პროცენტით მეტია არაფანებზე, “ნაიქის” შემთხვევაში ეს სხვაობა 31 პროცენტია, “კოკა-კოლასთვის” – 22, “მაქდონალდსისთვის” – 21, “ჯილეთისთვის” – 25, “სონი ფლეისთეიშენისთვის” კი – 40.

ერთ ფანს, როგორც წესი, სხვა ფანებიც მოყავს და ამას სრულიად უსასყიდლოდ აკეთებს (თუმცა, მისი წახალისება მაინც საჭიროა, ამაზე “სთარბაქსის” სოციალური მოდელის წარმატებაც მეტყველებს). ფანების თითქმის 70 პროცენტი აქტიურად ურჩევს მეგობრებს საყვარელ ბრენდს, მაშინ, როდესაც არაფანები 40 პროცენტით უფრო პასიურნი არიან. “ნოკიას” შემთხვევაში ეს სხვაობა 42 პროცენტის  ტოლია, “ნაიქისთვის” – 41 პროცენტი, “კოკა-კოლასთვის” – 29, “მაქდონალდსისთვის” – 32, “ჯილეთისთვის” – 32, “სონი ფლეისთეიშენისთვის” კი – 55.

ფეისბუქელ ფანთა 81 პროცენტი ბრენდთან ახლობლობას გრძნობს, ერთგვარ თვითიდენტიფიცირებას ახდენს მასთან, მაშინ, როდესაც არაფანთა შორის ეს ციფრი მხოლოდ 40 პროცენტია. ეს არარაციონალური დამოკიდებულებაა და მისი შეფასება არცთუ ადვილია, მაგრამ – ძალიან მნიშვნელოვანი. თუ ამ დამოკიდებულებას, პირობითად, განვიხილავთ როგორც ემპათიას, “ნოკიასთვის” ეს სხვაობა 51 პროცენტია, “ნაიქის” შემთხვევაში – 46, “კოკა-კოლასთვის” – 27, “მაქდონალდსისთვის” – 40, “ჯილეთისთვის” – 30, “სონი ფლეისთეიშენისთვის” კი – 56. თუ ამ დამოკიდებულებას განვსაზღვრავთ როგორც მადლიერების, სიხარულის გრძნობას, “ნოკიასთვის” ეს სხვაობა 44 პროცენტია, “ნაიქის” შემთხვევაში – 40, “კოკა-კოლასთვის” – 18, “მაქდონალდსისთვის” – 33, “ჯილეთისთვის” – 30, “სონი ფლეისთეიშენისთვის” კი – 54.

ყველა მონაცემის შესწავლისა და შეჯამების შემდეგ, Syncapse-ს ანალიტიკოსებმა ერთი საშუალოსტატისტიკური ფეისბუქელი ფანის ფასეულობა 136,38 დოლარად შეაფასეს.

ყველაზე ფასეული ფანები “მაქდონალდსს” ყავს, თითოეულ მათგანს კომპანიისთვის საშუალოდ 260 დოლარი მოაქვს, “ნოკიასთვის” ეს ციფრი 181 დოლარია, “ნაიქისთვის” – 210, “კოკა-კოლასთვის” – 138, “ჯილეთისთვის” – 102, “სონი ფლეისთეიშენისთვის” კი – 168.

ასე რომ, გაუფრთხილდით თქვენს ფანებსა და ფრენდებს და არასდროს გაანაწყენოთ, სიყვარულიდან სიძულვილამდე ხომ სულ ერთი ნაბიჯია. 🙂

© Lord Vader. Stylish Blog.
საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით და მხოლოდ არაკომერციული მიზნებით. This work is licensed under a Creative Commons Attribution-NonCommercial 3.0 Unported License.

___

ასევე:

როგორ დავაგროვოთ ლაიქები და მოვიზიდოთ კლიენტები?