ყველაზე ლამაზი ბლოგერები, ყველაზე ლოთი ბლოგერები, ყველაზე ჭკვიანი ბლოგერები…

იცით, თუ სად გადაეყრებით ყველაზე ლამაზ, ყველაზე ჭკვიან, ყველაზე ლოთ და სხვა ყველაზე, ყველაზე, ყველაზე ბლოგერებს?

ეს ყველაფერი დათვლილია.

მაგალითად, ყველაზე ბევრს ირლანდიელი ბლოგერები სვამენ. ეკონომიკური კოოპერაციისა და განვითარების ორგანიზაციის მონაცემებით საშუალოსტატისტიკური ირლანდიელი ბლოგერი სხვადასხვა ალკოჰოლური სასმელის სახით 14 ლიტრ ეთილის სპირტს იღებს წელიწადში, სასმელთა რიგიდან თუკი ლუდს ცალკე გამოვიტანთ, მაშინ ირლანდიელთა ლიდერობა კიდევ უფრო შთამბეჭდავია – 131 ლიტრი ლუდი წელიწადში. მეორე ადგილზე მყოფი ინგლისელი ბლოგერები წელიწადში 10 ლიტრ სპირტსა და 99 ლიტრ ლუდს მოიხმარენ, ფინელი და რუსი ბლოგერები კი, მართალია ლუდის სმით ვერ დაიკვეხნიან, მაგიერ, წელიწადში მიღებული 10 და 9 ლიტრი სპირტით, საპატიო რეიტინგში მესამე-მეოთხე პოზიციაზე არიან.

ცნობილია ყველაზე მსუნაგი ბლოგერების ადგილსამყოფელიც – ეს ამერიკის შეერთებული შტატებია. ჯანდაცვის მსოფლიო ორგანიზაციის მონაცემებით, ამ ქვეყნის ბლოგერთა 70 პროცენტს ზედმეტი წონის ზიდვა უწევს. თითქმის უახლოვდებიან მათ არგენტინელი და ახალზელანდიელი ბლოგერებიც, ევროპელთა შორის კი ბელარუსები და ინგლისელები ლიდერობენ, სადაც ბლოგერების 65 პროცენტს მომეტებული წონა აქვს.

თუ სულის სალხინებელს ეძებთ, მაშინ თურქ ბლოგებს უნდა მიაკითხოთ, სწორედ თურქი ბლოგერები არიან მსოფლიოში ყველაზე ღვთის მორწმუნენი და მოშიშნი – ევროკომისიის მონაცემებით, თურქეთში ბლოგერთა საშუალოდ 95 პროცენტია ასეთი. თუ ქრისტიანი ხართ და ისლამი არ გხიბლავთ, მაშინ, გირჩევთ, ყურადღება რუმინელ ბლოგერებს მიაპყროთ, სადაც 90 პროცენტია ღვთის მოშიში, მათ ბერძნები და პოლონელები თავიანთი 80 პროცენტით მოსდევენ. ყველაზე ღვთისპირიდანგადავარდნილი და “ბეზბოჟნიკი” ბლოგერები კი ესტონეთში ცხოვრობენ – იქ ღვთის მორწმუნე მხოლოდ 17%.

ყველაზე გონიერ ბლოგერებს თუ ეძებთ, მაშინ ჰონგ კონგს ან სინგაპურს უნდა მიაკითხოთ, სადაც ინტელექტის კოეფიციენტის (IQ) საშუალო მონაცემი 108 ქულაა, როგორც ეს ფსიქოლოგ რიჩარდ ლინის კვლევებმა დაადასტურა. ევროპელთაგან იტალიელი ბლოგერები გამოირჩევიან 102 IQ-თი. ისლანდიელი და შვეიცარელი ბლოგერების IQ 101-ია, ხოლო ბლოგერები ავსტრიიდან, ჰოლანდიიდან, ლუქსემბურგიდან, ნორვეგიიდან და გაერთიანებული სამეფოდან (დიდი ბრიტანეთი) საპატიო 100 ქულას უკაკუნებენ.

ყველაზე ბევრი მკითხველი ინდოელ ბლოგერებს ჰყავთ, ამას მარკეტინგული კვლევის სააგენტო NOP-ის მონაცემები აჩვენებს – საშუალოსტატისტიკური ინდოელი ხომ კვირაში 11 საათს უთმობს კითხვას და ისე რა ღმერთი გაუწყრება, ამ 11 საათის განმავლობაში რამდენიმე ბლოგიც არ შემოეკითხოს? ინდოელებს ჩამორჩებიან ტაილანდელები და ჩინელები სხვისი ნაწერის კითხვაში გატარებული 9 და 8 საათით. ევროპელთაგან ყველაზე კარგი მკითხველები ჩეხ, რუს, შვედ და ფრანგ ბლოგერებს ჰყავთ – ამ ქვეყნებში ადამიანები საშუალოდ კვირაში 7-6,5 საათს უთმობენ კითხვას.

ყველაზე ბედნიერ ბლოგერებს დანიაში შეხვდებით. ბედნიერების მსოფლიო ინდექსში ისინი 8,2 ქულით 10-დან პირველ ადგილს იჭერენ, რაც მე პირადად სულაც არ მაკვირვებს. მათ ოდნავ ჩამორჩებიან შვეიცარელი და ავსტრიელი ბლოგერები 8,1 და 8 ქულით. არაევროპელთაგან ავსტრალიელი და კანადელი ბლოგერები ლიდერობენ, რომელთა ბედნიერების ინდექსი 7,7 და 7,6-ია.

ყველაზე ლამაზი ქალი ბლოგერები კვლავ სკანდინავიაშია, მათგან კი ნორვეგიელები ლიდერობენ – ასეთია Beautiful People-ის მსოფლიოს ყველაზე ლამაზ ადამიანთა სიის მონაცემები, რომელშიც ნორვეგიელმა ქალებმა დადებითი ხმების 76 პროცენტი მოაგროვეს. მათ ჩამორჩნენ შვედი (73%), ბრაზილიელი (71%), იტალიელი (67%), ჰოლანდიელი (63%) და დანიელი (57%) ქალები, ისევე როგორც რუსები, რომელთა მონაცემიც 44 პროცენტია. ყველაზე ლამაზი მამაკაცი ბლოგერები კი შვედები არიან – მათი მონაცემი 65 პროცენტია. ამავე სიის თანახმად ინგლისელთა მონაცემი სულ რაღაც 12 და 15 პროცენტია ქალებისა და მამაკაცებისთვის შესაბამისად. ვერც გერმანელები დაიკვეხნიან თავიანთი 13 და 15 პროცენტით. მაგრამ ყველაზე ძალიან რუსი მამაკაცები “გამოირჩნენ” თავიანთი 13 პროცენტით – ეს ევროპელ მამაკაცებს შორის რეიტინგში ყველაზე დაბალი მონაცემია, რაც კიდევ ერთხელ ადასტურებს რომ ქართველ მამაკაც ბლოგერთა პერსპექტივები რუს ქალ მკითხველებს შორის კვლავ მაღალია.

© Lord Vader. Stylish Blog. საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით. This work is licensed under a Creative Commons Attribution-NonCommercial 3.0 Unported License.

___