ამოიცანი სექსისტი!

აჩრდილი დადის მსოფლიოში – აჩრდილი სექსიზმისა

მომხმარებელთა ასოციაციებს, ფემინისტურ დაჯგუფებებს, გენდერისტებს და რავიცი კიდევ ვის აღარ ახალი გასართობი აქვთ, დევიზით: “ამოიცანი სექსისტი!”

ცხონებულმა კონფუციმ კი თქვა, ძალიან ძნელია იპოვო სექსისტი იქ, სადაც ის არ არისო, მაგრამ ბევრი ამასაც ახერხებს.

სულ ახლახანს “სექსიზმთან მებრძოლ ქალთა კავშირი” თავს დაესხა Fast-Fashion-ის ამერიკულ ქსელს Forever 21-ს აი ამ მაისურის გამო

წარწერით “ალგებრაზე ალერგია მაქვს” (Allergic to Algebra). როგორც ჩანს, Forever 21-ს არაფერი სმენია მარია სკლოდოვსკა-კიურიზე – განაცხადეს აღშფოთებულმა სექსიზმთან მებრძოლებმა და კომპანიას მაისურის გაყიდვიდან ამოღებისკენ მოუწოდეს. Forever 21 ერთი პირობა კი გაძალიანდა, მაგრამ ბოლოს დაჰყვა და “ალგებრაზე ალერგიული” მაისურების გაყიდვა შეწყვიტა.

განრისხებულ გენდერისტთა მორიგ სამიზნედ JCPenney იქცა მაისურისთვის “მეტისმეტად ლამაზი ვარ, რომ საშინაო დავალება შევასრულო – ამის გაკეთება ჩემს ძმას მოუწევს” (I’m Too Pretty to Do Homework So My Brother Has to Do It For Me).

JCPenney დაფრთხა და მაისური გაყიდვიდან ამოიღო.

David & Goliath სახალისო და მხიარულწარწერიანი მაისურებით მოვაჭრე კომპანიაა, თუმცა “სექსიზმთან მებრძოლ ქალთა კავშირის” წევრებმა ვერც სახალისო და ვერც სამხიარულო დაინახეს წარწერაში “მეტისმეტად ლამაზი ვარ იმისთვის, რომ მათემატიკას შევაკლა თავი” (I’m Too Pretty to Do Math).

David & Goliath-ის სასახელოდ უნდა ითქვას, რომ ის სექსიზმის მამხილებლებს არ ეპუება და მაისურის გაყიდვას განაგრძობს.

მამაკაცის ტანსაცმლის მწარმოებელი ბრიტანული Topman “სექსიზმთან მებრძოლ ქალთა კავშირის” სამიზნეში მოხვდა მაისურზე გაკეთებული ასეთი წარწერის გამო: “ახალი მეგობარი გოგონა – რა ჯიშისაა ის?”

არადა, ჯერ კიდევ როდის იყო, ხევისბერი გოჩა რომ ამბობდა – გახსოვდეს შენი გერლფრენდი ვისი გორისააო.

ცოტა იუმორის გრძნობა არ გაწყენდათ, მემ(ზ)!

თუმცა ბოლო მაისურით, რომელზედაც ასეთი წარწერებია: (პრინციპით – მონიშნე სასურველი) ”მაპატიე მაგრამ შენ თავად გამომიწვიე; სიმთვრალეში მომივიდა; ცუდი დღე მქონდა; უბრალოდ ვერ გიტან; არ მინდოდა; თავი ვერ შევიკავე”

Topman-მა, ვფიქრობ, მართლაც დაუკრეფავში შეაბიჯა.

© Lord Vader. Stylish Blog.
საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით და მხოლოდ არაკომერციული მიზნებით. This work is licensed under a Creative Commons Attribution-NonCommercial 3.0 Unported License.

___

ასევე:

ყველაზე სექსისტური რეკლამები