სექს-შოფი ჭეშმარიტ მორწმუნეთათვის

“დაე, იყოს სექსი!” – აცხადებენ ქრისტიანული სექს-შოფის Christian Love Toys მესვეურები და თავიანთ ქრისტესმიერ დებსა და ძმებს სხვადასხვა სახის ინტიმურ სათამაშოებსა და ატრიბუტიკას სთავაზობენ. ინგლისური Guardian-ის ჟურნალისტი ქეს ელიოთი დაინტერესდა, თუ რით განსხვავდებიან ქრისტიანული და არაქრისტიანული სექს-მაღაზიები და Christian Love Toys-ის მფლობელებმა განუმარტეს, რომ თუ დანარჩენ სექს-შოფებში წარმოდგენილია პროდუქცია ყველასთვის: ტრადიციული და არატრადიციული, დაქორწინებული და დაუქორწინებელი, ჰეტეროსექსუალი და ჰომოსექსუალი წყვილებისთვის, ქრისტიანული სექს-შოფი პროდუქციას მხოლოდ კანონიერ ქორწინებაში მყოფ მორწმუნე წყვილებს სთავაზობს.

აქამდე ასეთ წყვილებს ინტიმური ატრიბუტიკის შეძენა შეეძლოთ მხოლოდ იმ მაღაზიებში, რომლებიც ყველა სახის, მათ შორის ქრისტიანთათვის მიუღებელი და პორნოგრაფიული პროდუქციითაც ვაჭრობენ, ამიტომ ამ მაღაზიებში ვაჭრობა მათთვის არაკომფორტული და მათი გრძნობებისა და სულიერებისთვის შეურაცხმყოფელი იყო. ძნელია ემსახურებოდე ღმერთსა და შენს მეუღლეს და, ამავე დროს, გონება დაიცვა იმ საცდურისგან, რაც ამგვარი მაღაზიების თვალიერებისას გელის. მათგან განსხვავებით, Christian Love Toys-ზე არ ჩანს შიშველი თუ ნახევრად-შიშველი სხეულის გამოსახულებები, არატრადიციული სექსუალური ორიენტაციის წარმომადგენელნი აქ სათავისოს ვერაფერს ნახავენ, მაღაზიაში არ იყიდება სადო-მაზო ატრიბუტიკა და იმ სახის ლიტერატურა, რაც ქრისტიანთათვის მიუღებელია – პორნო-ჟურნალებიდან დაწყებული და “კამა სუტრით” დამთავრებული.

სამაგიეროდ, მაღაზიის კლიენტებს შეუძლიათ ჩემოტვირთონ ბიბლიის ტექსტი და იხილონ უამრავი ლინკი სხვადასხვა ქრისტიანულ რესურსზე, რომელიც მოწოდებულია იქეთკენ, რომ მათი ქორწინება და ურთიერთსიყვარული კიდევ უფრო გაამყაროს.

და, რაც მთავარია, შეიტყონ თუ, ბოლოს და ბოლოს, სად მდებარეობს ეს მაგიური “ჯი წერტილი” (G-Spot).

მაგრამ, რა ქნან მუსლიმმა წყვილებმა? რა მტკვარში დურთონ თავი?

როგორც Times-ის ჟურნალისტი როჯერ ბოიესი წერს, მათ სექს-შოფი El Asira ელით. მართალია, სათამაშოებსა და სხვადასხვა ატრიბუტიკას იქ ვერ ნახავენ, სამაგიეროდ, შეუძლიათ შეიძინონ ლუბრიკანტები, გელები მასაჟისთვის და აფროდიზიაკებიც კი. მაღაზიის მფლობელები თავიანთი წამოწყების შესახებ მუსლიმ სასულიერო პირებს დაეკითხნენ. იმამმა ბულარია ჰუარიმ მათ განუცხადა, რომ “ისლამისთვის მნიშვნელოვანია, რომ მამაკაციცა და ქალიც განიცდიდნენ ორგაზმს, თუკი ქალმა ორგაზმი ვერ განიცადა, – განმარტა იმამმა, – ის გაუკუღმართებულ გზას მოძებნის, როგორიცაა მასტურბაცია და ვიბრატორები”. კიდევ ერთმა იმამმა აბდულ ჯაბარმა კი დასძინა, რომ სექსუალური სტიმულაციის პროდუქციის გაყიდვა ყურანს არ ეწინააღმდეგება, თუკი მათ შორის სექს-ატრიბუტიკა არ იქნება და მხოლოდ ქორწინებაში მყოფ წყვილებზე გაიყიდება. მიუხედავად სასულიერო პირების ასეთი მხარდაჭერისა, მაღაზიის მფლობელებს ეშინოდათ, რომ მათი წამოწყება (მუსლიმურ თემში მომეტებული სიფრთხილის, შიშისა თუ სხვა ფაქტორების გამო) მაინცადამაინც დიდ ინტერესს ვერ გამოიწვევდა, მაგრამ პირველ ოთხ დღეში 70’000-მა დაწკაპუნებამ (ანუ კლიკმა) აჩვენა, რომ ამგვარ მაღაზიაზე მოთხოვნა დიდი ყოფილა.

© Lord Vader. Stylish Blog.
საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით და მხოლოდ არაკომერციული მიზნებით. This work is licensed under a Creative Commons Attribution-NonCommercial 3.0 Unported License.

___

ავტორი: Lord Vader

Not stupid, or inconsiderate. Not obnoxious, or violent, or boring, or annoying. Not a bad dresser, not unemployed, and not unhandsome, either. Still drive people mad sometimes. :) View all posts by Lord Vader