ქემერონი ქემერონის წინააღმდეგ

რიგში დავიტანჯე.

ბილეთი ვიშოვე.

ფილმი მომეწონა.

ჯეიმს ქემერონს კარგა ხანია არაფერი გადაუღია. იმდენად კარგა ხანი, რომ ბევრს ის, ალბათ, გადაავიწყდა კიდეც.

მაგრამ ვისაც არ გადაგვავიწყდა. ვინც ამ რამდენიმე წლის წინ imdb.com-ზე წავიკითხეთ, რომ ქემერონი “რაღაც განსაკუთრებულის” გადაღებას შეუდგა. ვისაც ჯერ კიდევ გვახსოვდა, რომ ქემერონი არა მხოლოდ “ტიტანიკის” რეჟისორია, არამედ მეორე “ტერმინატორისა” და “უცხოებისაც” – ისინი მოუთმენლად ველოდით ახალ ფილმს და ფილმმა ჩვენი მოლოდინი, ვფიქრობ, ნამდვილად გაამართლა.

რა თქმა უნდა, პი-ინტელექტუალები შანსს არ გაუშვებენ ხელიდან, რომ ქემერონი ამხილონ მორიგი ბანალური ისტორიის გადაღებაში. და მერედა რაო? ალექსანდრ დიუმა ამბობდა, რომ მთელი მსოფლიო ლიტერატურა 5 ბანალურ ისტორიაზე დგას, მან კი მშვენივრად იცოდა, რას ამბობდა.

ფილმის შინაარსს არ მოვყვები. ვინც უკვე ნახა – არ ჭირდება, ვისაც არ უნახავს – მით უმეტეს. 🙂 ერთს კი ვიტყვი – გახსოვთ ფილმები ვინეტუზე და კიდევ ყველა ინდიელის საუკეთესო მეგობარ ჯონი გარდენზე, იგივე ერთგულ ხელზე? ჰოდა, ეგაა რა. ოღონდ, წითელკანიანები ლურჯკანიანებმა შეცვალეს, კოვბოის ფართოფარფლებიანი ქუდები – კოსმიურმა მუზარადებმა და ოქრო კი – რაღაცჯანდაბანიუმმა, რომელიც ჭიათურის მანგანუმს კი გავს, მაგრამ ძალიან, ძალიან, ძალიან ძვირი ღირს… იმდენად ძვირი, რომ ეგ რომ გვქონდეს ჭიათურაში, პენსია ჩვენთან უკვე იქნებოდა 100 დოლარი. შეიძლება – 150-იც კი.

 

“ავატარში” ყველა გემოვნების მაყურებელი იპოვის სათავისოს – იქაა ფანტასტიკაც, იქაა ფენტეზიც, იქაა ექშენი, იქაა, როგორც უძახიან ხოლმე, რომანტიკული ხაზი, იქაა იუმორიც (შიგადაშიგ)… ერთადერთი რაც იქ არაა – ესაა სპეცეფექტები. დიახ. ფილმში არც ერთი სპეცეფექტი არაა. ეს ფილმი თავადაა ერთი დიდი სპეცეფექტი! ისეთი სპეცეფექტი, რომელთან შედარებითაც “ვარსკვლავური ომები”, “მატრიცა” და “ბეჭდების მბრძანებელი” დოვჟენკოს სტუდიის ნაცოდვილარს გავს… რაც, სულ არ ნიშნავს იმას, რომ “ავატარი” ჩამოთვლილ ფილმებს მირჩევნია. სრულიადაც არა. უბრალოდ, “ავატარის” რამესთან შედარება – შეუძლებელია. ირლანდიელები ამბობენ – არის ბევრი კარგი ლუდი და არის “გინესიო”. არის ბევრი კარგი, ძალიან კარგი, შესანიშნავი ფილმი და არის “ავატარი”… ერთადერთი, რასაც ქემერონის ფილმი შემიძლია, შევადარო, არის  “ალისა საოცრებათა ქვეყანაში”, უფრო ზუსტად კი მისი თრეილერი, რომელსაც “ავატარამდე” უჩვენებენ და საიდანაც ჩეშირელი კატა პირდაპირ დარბაზში ხტება ეკრანიდან, თვალს გიპაჭუნებს და გიცინის… მოკლედ, ძალიან მაგარია. თან, Disney-ს გენიალურ სტუდიაშია გადაღებული, ჯონი დეფი თამაშობს და რეჟისორი კი თიმ ბერთონია. ასე რომ, გამაზვა არ შეიძლება… თუმცა, მგონი, თემას ავცდი. 🙂

იმას ვამბობდი, რომ “ავატარის” მსგავსი სანახაობა ჯერ არ გინახავთ. როდესაც 1896 წლის 6 იანვარს ძმებმა ლუმიერებმა აჩვენეს “მატარებლის ჩამოდგომა ლა სიოტას სადგურზე” (მადლობა მათ ამისთვის), მაყურებლები ფეხზე წამოცვივდნენ იმის შიშით, ემანდ მაგ მატარებელმა ჩვენ არ გადაგვიაროსო… სამწუხაროდ, დღეს ჩვენი გაკვირვება ასე იოლი აღარაა და გაოცების უნარიც დავკარგეთ, მაგრამ ის, რასაც “ავატარის” ყურებისას ეკრანზე ვხედავთ, ძალიან, ძალიან რეალურია. იმდენად რეალური, რომ ზოგჯერ, იქნებ, მართლა დაგავიწყდეთ, რომ ეს კინოა. პლანეტა პანდორას სამყარო მცირე დეტალების ჩათვლით დიდი რუდუნებითაა მოფიქრებული და ეკრანზე გადატანილი. ფლორა. ფაუნა. ხალხი. ენა. რელიგია. მითოლოგია… ეს ყველაფერი, შეიძლება, თოლქიენის მიერ გამოგონილ შუამიწეთს შევადაროთ… ანალოგია, სხვათა შორის, არაა ყურით მოთრეული – ქემერონისთვის ახალი სამყაროს შემქნის მოდელად სწორედ თოლქიენისტური მიდგომა იყო ამოსავალი, შემთხვევითი არაა, რომ მან ამისთვის მეცნიერთა მთელი ჯგუფი დაიხმარა. მოკლედ, ფილმის მხატვრების, ანიმატორების, ოპერატორების, სპეცეფექტებისა და უკლებლივ მთლიანად შემოქმედებითი ჯგუფის ნამუშევარი იმსახურებს 100 ქულას 100-დან და 10’000 ქულას 10’000-დან. ამას ყოველგვარი გადაჭარბების გარეშე ქვია ერთი სიტყვა – შ ე დ ე ვ რ ი.

• ამასთან, გაითვალისწინეთ, რომ ჩვენ ფილმს 3D ფორმატში, მაგრამ  ჩვეულებრივი ზომის დიდ ეკრანზე ვუყურებთ, არადა, მისი ნახვა IMAX 3D (Image Maximum – “მაქსიმალური გამოსახულება” ) კინოთეატრშია სასურველი.

რაც შეეხება ქემერონს, მან, ზემოთაც ვთქვი, ფილმში სხვადასხვა ჟანრის ჩაკვეხება მოახერხა ძალიან ოსტატურად (თუმცა, ამ ყველაფრისთვის დროც საკმარისი ჰქონდა – მთელი 162 წუთი :)), კარგად შეკრა სიუჟეტი და მშვენივრად შეარჩია მსახიობებიც…  ფანტასტიკის მოყვარულთა სახელით, განსაკუთრებული მადლობა მას სიგურნი უივერის არ-დავიწყებისთვის. 🙂 ზოი სალდანა პანდორელ ნეითირის თამაშობს (სწორედაც რომ თამაშობს – “ავატარი” მხატვრული ფილმია და არა ანიმაცია. მსახიობებმა როლები საგანგებო სენსორებასხმულებმა შეასრულეს, რათა ფილმის შემქმნელებს ეს ყველაფერი ციფრულ გრაფიკაში რეალისტურად გადაეტანათ), სთივენ ლენგი ძალიან დამაჯერებელია მთავარი ცუდი ტიპის – პოლკოვნიკ ქუერიჩის როლში (სხვათა შორის, ქემერონმა ლენგი თავის დროზე დაიწუნა და “უცხოებში” არ აიყვანა), ახალგაზრდა ავსტრალიელი სემ უორთინგთონი ცოტა სენტიმენტალური ჩანს და სთივენ ლენგივით მაგარი ბიჭი ვერაა, მაგრამ, ფილმისთვისაც ასეა საჭირო, მიშელ როდრიგესი თავისი კინოკარიერისთვის უკვე ჩვეულ მაგარ გოგოს თამაშობს და თან კიდევ ერთხელ გვჩვენებს, რომ ლამაზი ძუძუები აქვს.

 

• ლენინგრადისა და ლენინგრადის ოლქის კომუნისტური პარტიის ცენტრალურმა კომიტეტმა  ქემერონს საბჭოთა ფანტასტიკის გაქურდვაში დასდო ბრალი და რუსეთის პროკურატურას მის წინააღმდეგ სამართლებრივი დევნის დაწყება და საერთაშორისო ორდერის გაცემა მოთხოვა. მათი მტკიცებით, პანდორა საბჭოთა ფანტასტების მიერ მოგონილი პლანეტაა და ქემერონმა სტრუგაცკების, ეფრემოვის, ბულიჩევისა და რეჟისორ პაველ არსენევის მემკვიდრეობა მიითვისა. “მისი ადგილი ოსკარის ცერემონიაზე კი არა, ციხის ნარებზეა” – განმარტა რუსი კომუნისტების მოთხოვნა კომპარტიის კიროვის საოლქო კომიტეტის მდივანმა ლიუბოვ კალაშნიცინამ… კომუნისტების მოწოდება ბევრმა “პატრიოტმა” აიტაცა და ფსიქოზმა რუსულ ინტერნეტში იმ ზღვარს მიაღწია, რომ ბორის სტრუგაცკის ოფიციალური განცხადების გაკეთებაც კი მოუწია – ქემერონთან პრეტენზიები არ მაქვს და არც არსად ჩივილს ვაპირებო. лечиться надо!

ყველაფერთან ერთად, “ავატარს” სამი უდიდესი ღირსება გააჩნია:

პირველი მსოფლიო მასშტაბისაა – როგორც იქნა ჩამოალაბორანტა ქემერონისეულივე “ტიტანიკი” (რომელიც არ მინახავს :)) ყველა დროის ყველაზე შემოსავლიანი ფილმების სიის პირველი ადგილიდან.

მეორე და მესამე ლოკალურია – თბილისში ჩამოატანინა 3-განზომილებიანი პროექტორი და კინოთეატრს დაუბრუნა ქართველი მაყურებელი, ვინაიდან ავოე.ჯიზე ამ ფილმის ყურებას უბრალოდ არანაირი  ა რ ა ნ ა ი რ ი აზრი არ აქვს.

© Lord Vader. Stylish Blog. საავტორო უფლებები დაცულია. ნამუშევრის კოპირება, ციტირება და გამოქვეყნება დაშვებულია მხოლოდ ავტორისა და წყაროს (პოსტზე ლინკის) მითითებითა და ნებართვით. This work is licensed under a Creative Commons Attribution-NonCommercial 3.0 Unported License.

___

___

P.S.

ეს პოსტი არ იარსებებდა, Taboo-ს ბლოგზე გამართული დისკუსია რომ არა – ასე რომ, თუ არ მოგეწონათ, პრეტენზიებით მას მიმართეთ. 🙂